Video: Pa sirbi e CMC superavansá di forma inovativo: ‘Labstraat’ di ADC ku Atellica analyzers ultramoderno

Pa sirbi e CMC superavansá di forma inovativo:
‘Labstraat’ di ADC ku Atellica analyzers ultramoderno

ROODEWEG – Laboratorio nashonal ADC NV ta dal un stap importante pa sirbi e Curaçao Medical Center, ku lo habri pronto, di forma inovativo i moderno. Den e kuadro ei Atellica analyzers – suministrá dor di Siemens Healthineers – a yega nos isla.

E analyzer-nan akí ta e kurason di e departamentu di Kímika Klíniko i Hematología (‘KCH’). Tèstnan rápido, na e nivel di mas haltu i akreditá di laboratorio, ta posibel – loke ta sumamente apropiá pa, entre otro, tratamentunan emergente. Por kumpli ku otro nesesidatnan di análisis tambe mas mihó ku nunka, na benefisio di e poblashon lokal.

 

‘Hanchi’ revolushonario

A remodelá e lokalidat di ADC na Roodeweg pa por akomodá e analyzer-nan akí durante e simannan benidero den un asina yamá ‘labstraat’. E ‘labstraat’ ta manera un hanchi ku diferente aparato sofistiká tras di otro: e interkonekshon outomatisá akí ta algu revolushonario. Na kabes di e ‘hanchi’ ta programa tur kos i e material ta pasa un solo biaha dor di e ‘hanchi’ pa na final tur resultado deseá sali.

 

E Atellica analyzer-nan ta flèksibel i ta pèrmití hasimentu di tèst ku un mínimo di material (manera, por ehèmpel, sanger) den un espasio relativamente chikitu. Pa duna un idea: e produktividat pa tèstnan imuno-kímiko ta esun di mas haltu pa meter kuadrá riba tereno di tèst di laboratorio, ku mas ku 400 tèst pa ora posibel.

 

Validashon
Manager di proyekto Patrick Elshout di Siemens ta na Kòrsou pa kordiná e trabou di instalashon. Huntu ku dos tékniko lo e sòru pa e validashon di e sistema tambe. E kímikonan klíniko Bert Dikkeschei, Gijs den Besten i Robbert Slingerland di e Hospital Isala na Zwolle, Hulanda tin e parti analítiko di esaki bou di nan enkargo. Siemens Healthineers lo keda sigur seis siman mas na Kòrsou pa duna asistensia tékniko lokal. Kolaboradónan di ADC tambe lo haña e entrenamentu nesesario.

 

Teksto huntu ku potrèt, video:

Direktor interino Liane Virginia-Cova (ADC NV) i direktor i supervisor ministerial Stanley Betrian (GMN/HNO-MRT) ta pose  i  haña splikashon na e Atellica analyzers serka Patrick Elshout (Siemens  Healthineers). Wak un vídeo di e yegada di e Atellica analyzer-nan for di awe riba e página di Facebook di laboratorio ADC.

 

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: