Minister Ruiz-Maduro a reuni cu Secretario di Estado di Hulanda encarga cu Finanzas 

Minister Ruiz-Maduro a reuni cu Secretario di Estado di Hulanda encarga cu Finanzas 

 

ORANJESTAD – Durante bishita na Embahada di Hulanda na Cuba, Minister Ruiz-Maduro a reuni cu Secretario di Estado encarga cu Finanzas pa Hulanda, sr. Menno Snel hunto cu Embahadora pa Hulanda na Cuba y Jamaica sra. Alexandra Valkenburg. 

Durante e reunion a toca e tema di Union Europeo su lista preto y e noticia cu Aruba a wordo kita for di e lista aki. E carta oficial a drenta e siman aki na despacho di Minister di Finanzas y cu esaki Aruba oficialmente ta bek den e grupo di Paisnan cu ta cumpli cu e reglanan fiscal Europeo.

Minister Ruiz-Maduro a conbersa cu sr. Snel tambe riba e acuerdo fiscal entre Hulanda y Aruba cu mester bay wordo actualisa ya cu despues cu a bin cambio di 10-10-10, e tema aki no a keda trata mas. E mandatarionan a toca tambe e asistencia technico necesario pa facilita Aruba cu cumplimento di e reglanan internacional fiscal. Entre Aruba cu Hulanda ta existi un asistencia pa hopi tempo y nos kier sigui conta cu e asistencia pa vigila e cambionan cu Aruba mester implementa pa por keda den cumplimento cu e reglanan fiscal internacional.

Na final di e reunion e mandatario a presenta sr. Snel y sra. Valkenburg cu un regalo di recuerdo di Aruba gradiciendo nan pa e tempo dedica na interes di nos Pais den Reino.