MINISTER QUINCY GIRIGORIE DEN RUEDA DI PRENSA ATROBE, ANTO KIKO????

MINISTER QUINCY GIRIGORIE DEN RUEDA DI PRENSA ATROBE, ANTO KIKO????

Minister di Hustisia mr. Quincy Girigorie no ta yuda Kòrsou apsolutamente ku nada dor di sali padilanti den medionan di prensa mas bien pa trankilisá pueblo. Aña pasá ainda e  minister aki tabata pretendé ku sifranan a proba ku krímen a baha na Kòrsou, siendo e sintimentu kolektivo tabata otro pasobra vários suidadano te den nan kas a keda konfrontá ku kasonan di maltrato físiko doloroso i humiante, okashoná pa ladron. ATRAKO, nos ta yama e situashon, kaminda esun atraká a keda agredí físikamente, pero pió ainda tin kasonan di tiroteo. Awendia práktikamente tur santu dia tin sikiera 1 atrako ta tuma lugá na Kòrsou i ta un situashon berdaderamente teribel. Rumannan i prinsipalmente na ministernan di Hustisia e rekomendashon pa stòp ku e show sin sabor di sigui bin padilanti pa relativá krímen na Kòrsou! E sistema ei no ta funshoná mas, pasobra indirèkt ta hasi komo si fuera ta sin ta na nodi nos hendenan ta prekupá. Ta djis pa smak nos hendenan, habitantenan den bario, ta prekupá pa nan seguridat i tin asina tantu miedu! Apart di negoshinan ku ta sera i hendenan ta pèrdè trabou na gran eskala, nos tin venezolanonan indokumentá ku ta yega Kòrsou ku lanchanan di kua ta konosí di karganan di armanan di kandela i droga ku e venezolanonan aki ta yega na kosta di Kòrsou kuné pa drop hende. Lógikamente ta faktornan ku ta kita e trankilidat den pueblo. Ministernan di Hustisia mester buska otro manera pa komuniká ku pueblo, e sistema aktual ta duna un señal muchu pasivo. Miéntras minister di Hustisia Quincy Girigorie hopi trankil ta hunga ku su sifranan aki banda, aya banda tur santu dia korantnan ta publiká kasonan di krímen. Hasta ta posibel manda filmashon via whatsapp den e komunidat aki di kasonan ku a kaba di sosodé. Tuma komo ehèmpel e suidadano Yves Cooper, kende resientemente a yega su kas hañ’é ku un ladron violento i agresivo, ku kende el a bringa teriblemente i a logra ku polis por a bini na e sitio pa arestá e malechor. No lubidá otronan ku malechornan a ‘hands up’ den nan kas òf negoshi i eksigí plaka òf otro propiedat balioso mesora. Ta p’esei e show di djis intentá pa trankilisá pueblo ya no ta duna fruta, mester atendé di otro manera. E minister a laga sa ku e tin plan, pero pa kuminsá minister di Hustisia mester bini ku sistemanan ku tin e impakto di kòntròl den barionan i asina ei prevení krímen di bèrdat. Sistemátikamente mester drenta nos barionan ku polis un banda, pero tambe ku profeshonalnan ku ta yuda trese kambio den nos hendenan su sirkunstansia di bida. E miedu òf enorme spantu den pueblo pa krímen ta un aspekto legítimo ku lo no bira ménos si ta ku sifra minister ta pensa ku lo kit’é, e kos no ta funshoná asina ei! Minister mr. Quincy Girigorie di orígen ta un hurista, pues e tin sierto konosementu di e materia aki, pero krímen en realidat ta muchu mas kompliká i di un embergadura mas amplio ku trabounan di abogasia. Krímen por ehèmpel ta den un relashon estrecho ku edukashon i formashon na kas, skol i den bario, ta resultadonan di e sirkunstansia sosial en general, esta di empleo òf nò i sigur pa loke ta trata e sirkunstansia di entrada, bibienda etcetera. Gobièrnu Rhuggenaath mester profundisá porfin den e sirkunstansia sosial di nos hendenan i trata mas tantu posibel pa trese kambionan duradero den esei. Sa di bèrdat kon e suidadano ta biba i komo gobièrnu, polítikonan i doñonan di empresa por aportá na kambionan real pa subi kalidat di bida. Kriminalidat den e komunidat aki gobièrnu ni ningun polítiko no por hèndel djis dor di harma un show den purá dilanti di kámaranan di televishon pa stroi ku sifranan di kriminalidat. Komunidat di Kòrsou ta den un situashon di inseguridat enorme debí na tantísimo faktor ku e minister di Hustisia ta debidamente na altura di dje, pues pèrsèpshonnan den pueblo no por kita nan djis ku palabra, sino únikamente ku akshonnan konkreto ku ta duna resultadonan tangibel. E kos aki apsolutamente no ta djis un wega di palabra, basá riba ekspreshonnan pa trankilisá pueblo. Gobièrnu mester rondoná su mes ku profeshonal i ekspertonan ku por asesor’é no solamente saliendo for di e konteksto finansiero ekonómiko di e komunidat aki sino tambe di esun sosial. ERWIN RAPHAELA