Minister Xiomara Ruiz-Maduro ta informa: Conseho di Minister a haya presentacion di hoben Arubiano experto den Economia Circular

Minister Xiomara Ruiz-Maduro ta informa:

Conseho di Minister a haya presentacion di hoben Arubiano experto den Economia Circular
ORANJESTAD – Diaranson ultimo Conseho di Minister di Gabinete Wever-Croes a haya un presentacion di e hoben Arubiano sr. Kevin de Cuba kende ta un experto riba e tereno di Economia Circular. Sr. De Cuba ta director di ‘Americas Sustainable Development Foundation’ y ta fundador di ‘Circular Economies Platform for the Americas.’
Economia Circular ta dirigi riba e sistema economico na unda ta minimalisa desperdicio y haci uso mas conciente y eficiente di tur recurso. Un economia na unda di ora un producto wordo importa na nos Pais, nos por sa su contenido y por premira caba con pa haci uso maximo di dje, door di reusa pa evita cu e ta keda reduci na sushi y tambe recycla pa asina e material prima haya bida den un otro producto util den comercio y pa comunidad.
Un di e 6 sectornan prometedor pa por diversifica economia di Pais Aruba ta Economia Circular, pesey pa por concretisa e tipo di economia aki ta importante pa Conseho di Minister ta na altura di kiko ta e retonan y posibel solucion pa asina por agilisa e proceso pa haci economia circular posibel na nos Pais.
Banda di hecho cu Economia Circular ta trece cune oportunidad pa diversifica nos economia, e ta trece cune tambe un manera cu comercio por crece na un manera duradero y sostenibel. Nos no por keda sostene riba e economia linear cu ta importa producto, haci uso di dje y despues djies bente afor. Nos mester bay bira mas conciente como Pais di kiko ta locual nos ta importa na material y ta mas creativo con pa reusa y recycla pa asina nos por haci di Aruba un Pais duradero pa biba riba dje.

This site uses Akismet to reduce spam. Learn how your comment data is processed.

error: Content is protected !!
%d bloggers like this: