Buskando talento di kanto pa muchanan entre 6 pa 12 aña

Buskando talento di kanto pa muchanan entre 6 pa 12 aña

 

Willemstad – Djadumingu 30 di yüni, I Believe Creative Center huntu ku Roald Balentien ta organisá un oudishon dirigí na tur mucha entre 6 pa 12 aña ku ta interesá na forma parti di un grupo di kanto. E oudishon lo tuma lugá na Sambil di 11or di mèrdia pa 4or di atardi. E oudishon ta grátis i partisipantenan mester presentá ku un (1) adulto.

Meta di e oudishon, ta pa duna tur mucha e mesun oportunidat di demostrá nan abilidat komo kantante. E mucha ta liber pa skohe e kansion ku e kier presentá. Despues di djadumingu, hurado lo sinta huntu i selektá un kantidat di mucha ku ta pasa pa e siguiente ronda. Durante e di dos i ultimo ronda lo skohe e partisipantenan ku lo forma parti di e grupo.

Nan lo risibí guia i komposishonnan serka Roald Balentien pa desaroyá nan talento. Den futuro serkano nan lo partisipá den diferente proyekto ku e organisashon tin na kaminda.

Entretantu, tin mas musiko ku a konfirmá nan interes pa kolaborá ku nan komo kompositor i/òf areglista pues nos tin sigur ku e grupo lo bai ta un tremendo inisiativa.  

Pa por partisipá na e oudishon mester registrá. Por hasi esaki via e página di Facebook “I Believe Creative Center” òf via whatsapp 692-4818. Na momentu ku registrá e yu(nan), mayornan lo risibí tur sobrá detayes di partisipashon ku tin ku tene kuenta kuné.

Desaroyo musikal tin gran impakto riba un mucha su prestashon en general. Analies Hooi i Roald Balentien ta mira e importansia di esaki i a uni forsa pa start e proyekto aki. Invitashon ta bai na tur mucha ku ke formá parti di e proyekto i tin e abilidat di kanta, pa partisipá na e oudishon, djadumingu 30 yüni proksimo.

This site uses Akismet to reduce spam. Learn how your comment data is processed.

error: Content is protected !!
%d bloggers like this: