Frakshon di MFK no ta sostené maneho hiba pa gabinete Rhuggenaath, Moshon di MFK ta un instrukshon pa gabinete Rhuggenaath sali na interes di pueblo di Kòrsou

Frakshon di MFK no ta sostené maneho hiba pa gabinete Rhuggenaath, Moshon di MFK ta un instrukshon pa gabinete Rhuggenaath sali na interes di pueblo di Kòrsou

Frakshon di MFK den reunion di djaluna último a tuma e posishon pa para na banda di pueblo, relashoná ku e posibel instrukshon (Aanwijzing) ku gobiernu di Reino ta bai duna gabinete Rhuggenaath.

Gabinete Rhuggenaath ta e gabinete di mas malu ku Kòrsou a konosé for di 101010, nos posishon den Staten pa medio di un moshon ku frakshon di MFK a entrega ta pa salbaguardiá interesnan di pueblo di Kòrsou. Ningun momentu e posishon i strategia ku frakshon di MFK a hiba durante di e reunion aki tabata pa duna gabinete Rhuggenaath sosten pa e maneho ku nan a bin ta hiba.

Ta insolito ku promé Minister Rhuggenaath por deklará ku su persona a heredá e situashon aktual, Rhuggenaath ta den gobernashon for di novèmber 2015 i e ta kómplise i kulpabel di e situashon malu ku Kòrsou ta pasando aden. Nos no mester lubidá ku ta Eugene Rhuggenaath komo minister di ekonomia huntu ku Ettiene Ys a kuminsá ku e trayekto pa regalá Insel Air un kompania priva mas ku 33 mion florin i despues eks Minister Martina ta pone Curacao Airport Partners para garantia pa 1.5 mion dòler adishonal. Miéntras ku nan tabata debidamente na altura ku e situashon finansiero di Kòrsou ta malu.

Pa bin bek riba e posibel instrukshon ku Hulanda ta bai duna gabinete Rhuggenaath, nos no mester lubidá ku gabinete Rhuggenaath a neglishá e atvertensianan di Kontrolaria General i CFT ku atministrashon finansiero di gobiernu ta kompletamente for di òrdu. Lo no straña nos si mayan bin un “Begrotingskamer” ku gabinete Rhuggenaath lo pone nan konsehonan tambe un banda.

Gabinete Rhuggenaath no a traha for di “Day 1” relashona ku e situashon finansiero di Gobiernu, no a hasi nada pa pusha ekonomia. Al kontrario for di febrüari no tin minister di ekonomia. E echo ku te awe no tin un Minister di ekonomia ta mustra pueblo, ku polítika partidista i laga e funshon Ministerial di desaroyo ekonómiko sin un titular, ta mas importante pa formadó Eugene Rhuggenaath. Miéntras ku pais Kòrsou ta pasando den un situashon ekonómiko ku mester di atenshon urgente pa pueblo di Kòrsou por kuminsá hala rosea, pero esaki no ta un prioridat pa Rhuggenaath.

Gabinete Rhuggenaath a purba di bende Kòrsou barata via di nan “Groeistrategie” i a bisa pueblo ku Hulanda lo yuda i awor ku un posibel instrukshon riba nan stupi, nos ta mira ku esaki tabata otro mentira di Eugene Rhuggenaath. Si frakshon di MFK no tabata lanta den Parlamento i promé Minister Rutte, no a hasi e fout di grita “Aanwijzing” muchu trempan, frakshonnan di PAR, MAN i PIN lo a negoshá “Geschillenregeling” estilo “Knops” a kambio di no haña instrukshon.

Ku e moshon ku MFK a entrega i a wòrdu aprobá den Parlamento, MFK ta obligá gabinete Rhuggenaath pa na promé lugá karga nan responsabilidat i bai Hulanda bai atendé ku e posibel instrukshon. Na di dos lugá pa mustra Hulanda ku si nan aprobá e instrukshon, esaki ta habri porta pa Kòrsou terminá ku e “Consensus Rijkswet Finansiero” i nos mes ta tuma e timon pa atendé ku nos problemanan finansiero.

Por último e pueblo aki no por karga ku e medidanan di e forma ku Hulanda kier pa bai atendé ku e défisitnan, ku gabinete Rhuggenaath a krea durante na dos añanan di gobernashon. Si mester bin medida, esaki mester ta di tal forma ku e no ta kaba di mata nos ekonomia i ku mas hende lo bai pèrdè trabou i kriminalidat ta sigui oumentá.

Ta esaki ta loke frakshon di MFK a hasi den Parlamento i esaki no ta un sosten pa gabinete Rhuggenaath, e moshon aki mester wòrdu konsiderá komo un instrukshon pa nan bisti nan karson i sali na interes di pueblo di Kòrsou.

Pa MFK pueblo di Kòrsou ta na promé lugá i e loke Parlamentarionan ku ta sostené e gobiernu aki kier laga aparentá riba retnan sosial ku MFK a duna sosten na gabinete Rhuggenaath ta “Whishful Thinking”, lamentablemente nan no tin sufisiente kapasidat pa a komprondé loke a pasa den Parlamento.

Kòrsou, 12 di yüni 2019

Na nòmber di frakshon di MFK

Charles Cooper

Miembro di Parlamento

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: