Gobierno di Aruba a recorda awe Anne Frank su fecha natalicio

Gobierno di Aruba a recorda awe Anne Frank su fecha natalicio

ORANJESTAD – Hunto cu Secretario di Conseho di Minister sra. mr. Grace Koolman, Minister di Finansa, Asuntonan Economico y Cultura sra. mr. Xiomara Ruiz-Maduro den nomber di Gobierno di Aruba a recorda awe Anne Frank su fecha natalicio. Anne Frank tabata un hoben Hudiu cu mester a sconde hunto cu su famia pa e Nazinan cu tabata persigui nan durante e Segunda Guera Mundial. Den su diario e tabata nota y relata kico e y su famia tabata pasa aden. El’a haci esaki di su 12 pa 14 aña ya cu su 15 aña Anne Frank a fayece den e campo di concentracion Belgen/Belsen na maart 1945.

Na bida Anne Frank lo a cumpli 90 aña awe. Gobierno di Aruba ta para un rato pa recorda e forza di un mucha pa pasa den momentonan asina duro den bida y relata esaki pa mundo por corda cu nos mester tin tolerancia pa diferencia y respet pa bida di otro.