SINTA NA MESA PA YEGA NA UN SOLUSHON PA NOS PROBLEMANAN FINANSIERO EKONOMIKO

SINTA NA MESA PA YEGA NA UN SOLUSHON PA NOS PROBLEMANAN FINANSIERO EKONOMIKO

 

Willemstad–Kámara di Komersio i Industria a tuma nota resientemente di e diskushon i e moshon nan di Staten ku a pasa pa loke ta posibel aanwijzing di Reino Hulandes pa ku e situashon finansiero di nos Pais.

Kámara di Komersio ta totalmente di akuerdo ku e promé moshon kaminda a puntra Gobièrnu di Kòrsou pa bai Hulanda i hiba deliberashon nan ku Gobièrnu di Reino pa loke ta trata oportunidat nan i por sierto te hasta efektividat di e aanwijzing bou di e sirkunstansia nan sosioekonómiko aktual. Nos ta kere ku esei mester tabata e posishon semper, esta sinta na mesa pa yega na un komprondementu entre partidonan i nos ta kontentu di tende ku e desishon di Gobièrnu di Kòrsou ta pa biaha pa Hulanda.

E otro moshon kaminda ku Parlamento a bisa ku lo pasa CFT si un aanwijzing bin pa lanta nos mes begrotingskamer, ta un desishon ku lo tin su efektonan negativo pa futuro di Pais i ta algu ku nos no mester ke. E kos bon ta ku ora nos kere ku nos tin un “enemigu” eksterno, den e kaso aki CFT, nos tur ta parse di por yega na akuerdo lihé kontra di e “enemigu”. Speransa ta ku nos lo sa di traha ku otro meskos pa nos mes bienestar den ousensia di un “enemigu” eksterno. E problema ta ku den e kaso aki CFT no ta nos “enemigu”. CFT ta un mensahero. E moshon ta purba mata e mensahero ku ta bisando nos korektamente ku nos finansa públiko no ta na òrdu. No ta kos ku nos no sa. Nos ta komprondé ku nos situashon finansiero parsialmente tin di aber ku e situashon na Venezuela, pero no ta Venezuela so. Kámara di Komersio a trese dilanti na vários okashon ku Gobièrnu mester hasi un ehersisio di baha gastunan i kambia manera di operá i tin kaminda pa nos hasi esei. Un finansa públiko sano tambe ta importante pa un ekonomia kresiente i ta un ekonomia kresiente nos mester pa finansiá mihó edukashon, mihó salubridat públiko, mas seguridat i mas bienestar pa nos tur.

Nos ta di opinion ku tanten nos no drecha e situashon finansiero, no por tin ningun diskushon tokante di un begrotingskamer di nos mes. E prioridat mester ta pa drecha e situashon, despues por papia di begrotingskamer, paso e begrotingskamer riba su mes no lo kambia e situashon sosioekonómiko i finansiero. Pa aworakí e begrotingskamer lo djis gasta energia i sèn ku nos mester pa drecha situashon di Pais i nos siudadanonan.

Den nos nota resien “Sembra awe pa kosecha mayan” nos ta mustra ku tin hopi kos ku nos mester hasi pa bòltu e direkshon negativo di Pais i ku a bira tempu pa hasi e kambio nan ei. Keda hasi meskos i ferwagt diferente resultado ta lokura. Nos mester kuminsá invertí mas den nos poblashon (edukashon i imigrashon), eliminá burokrasia i traba nan pa hasi negoshi i krea empleo digno, i drecha nos sistema eksihiendo muchu mas responsabilidat di kada hende ku ta biba na Kòrsou. Tanten ku nos no hasi e kambionan básiko i kuminsá tuma responsabilidat, un ekonomia kresiente ku lo yuda drecha finansa públiko i e seguridat sosial lo no tuma lugá.

Nos mester tuma e posishon komo pais ku nos mester tuma akshon drástiko pa sali for di e spiral negativo ku Kòrsou a konosé último 20 aña. Bati man riba mesa pa hala atenshon pa e problema ku a bira mas kompliká ta bon, pero awor nos mester tuma rienda di nos mes situashon i futuro, sin sera porta pa yudansa di niun hende òf pais. Laga nos mustra ku nos ta komprondé e situashon i lo traha pa drecha esei, ku òf sin Hulanda. Komo partner den Reino, nos no mester konta ku ayudo, pero si nos lo apresiá ayudo di Hulanda pa nos situashon kritiko ku a bin ta stoba pa mas ku 20 aña kaba. Ta na mesa por papia pa komprondé otro.

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: