Diskurso di Presidente di UNSEBAKO mr Juny J. Sluis na okashon di selebrashon di e di 5 aniversario (prome lustro) di UNSEBAKO dia 21 di yüni 2019

Diskurso di Presidente di UNSEBAKO mr Juny J. Sluis na okashon di selebrashon di e di 5 aniversario (prome lustro) di UNSEBAKO dia 21 di yüni 2019

 

Distinguido presentenan,  Direktiva, Konseho di Federeshon i Tim di Sosten di UNSEBAKO, Presidente i direktiva di sentronan di bario afiliá na UNSEBAKO, Boluntarionan, Invitadonan spesial, Representantenan di medionan di komunikashon sosial, damas i kabayero, di mi parti tambe bon tardi i Bon Biní na nos selebrashon di e prome lustro di UNSEBAKO, e Union di Sentronan di Bario di Kòrsou.

Apresiado invitadonan, permití mi pa, prome ku drenta kontenido di mi diskurso, na hasi algun remarke preliminar.

Na promé lugá mi ke ekspresá gratitut pa e konfiansa ku nos konseho di federashon a demostrá den mi pa re-eligí mi persona komo presidente di UNSEBAKO. Boso por ta sigur ku mi lo sigui hasi esfuerso huntu ku e demas miembronan di mi direktiva, pa huntu nos logra sentronan di bario bon organisá di manera ku tur lo sigui sirbí e barionan ku kada unu ta sirbi aktualmente.

Mi ke hasi uso tambe di e okashon aki pa na nòmber di UNSEBAKO gradisí mi otro koleganan di direktiva pa nan esfuerso i sosten durante e ultimo 5 añanan komo dirigentenan fiel i firme den e kousa. Nan tambe a haña aprobashon di Konseho di Federashon di UNSEBAKO pa sigui pa un periodo mas den nan funshon komo dirigente di UNSEBAKO. Mi ta felesitá pa e motibu ei koleganan Gertrude Isidora, Franklin Mathilda (ku aktualmente pa permanesiendo den eksterior), David Brug i Jonathan Plantijn. Igualmente mi ta yama bon biní den direktiva dos kolega ku a keda eligí awe komo miembro di direktiva di UNSEBAKO kendenan ta señores Oswin Cijntje i Rudsel Marchena.

Damas i kabayeros, manera entretanto boso lo a nota, e direktiva di UNSEBAKO a krese. Esei indudablemente lo nifiká ku UNSEBAKO komo organisashon lo ta muchu mas fuerte, loke riba su turno lo perkurá pa mihó funshonamento di sentronan di bario afiliá. Mi ke pidi un fuerte aplouso pa e direktiva ku entrante awe ta tuma rienda di UNSEBAKO pa e siguiente periodo na su enkargo.

Pèrmiti mi tambe na ekstendé un palabra di rekonosimetu i gratitut na direktivanan di tur e 18 sentronan di bario ku ultimo 5 aña a karga i sostené fundashon UNSEBAKO. Ta e determinashon i konsistensia ku huntu boso a demostrá durante ultimo 5 aña a perkurá pa e eksito di UNSEBAKO. Pabien na boso tur!

 

Distinguido invitadonan, na un okashon manera esaki, ta parse mi na su lugá, pa tira un bista atras riba loke tur a tuma lugá ultimo 5 aña pa loke ta e organisashon UNSEBAKO. Di e forma ei nos lo por saka’fo si komo organisashon realmente nos a logra e meta ku nos a pone nos dilanti i ku desde luego e organisashon a mantené su derechi di eksistensia.

Meta di UNSEBAKO

UNSEBAKO a keda fundá dia 21 di yüni 2014 ku e meta pa den union sentronan di bario mes yuda, sostené i motivá otro, interkambiá konosementu I eksperiensia, di manera ku huntu nos ta logra un bon funshonamentu di kada sentro di bario individual.

 

Kiko realmente a sosodé durante e ultimo 5 añanan?

Na prome lugá mester rekonosé ku e komishon ku a prepará lantamentu di fundashon UNSEBAKO a perkurá pa un struktura organisatorio sólido, konsistiendo di un direktiva (ku ta manehá e organisashon), un Konseho di Federashon (ku ta fiha e maneho di e organisashon), 5 komishonnan fiho (ku den kasonan indiká ta prepará e maneho), i un tim di sosten ku ta konsistí di diferente profeshonal ku por duna konseho riba diferente tereno.

Nos por bisa tambe ku e struktura aki a funshoná bon, ounke ku aki-aya tin espasio pa perfekshon.

Direktiva / Konseho di Federashon / Interkambio di konosementu i  eksperiensia

E direktiva di UNSEBAKO ku durante e ultimo 5 añanan a konsistí di 5 miembro a funshoná bon ehekutando e maneho ku e konseho di federashon a stipulá. Komo ku direktiva ta konsistí di personanan ku ta okupá funshonnan den diferente otro organisashon, ku sierto regularidat tabata hasi uzo di medionan di komunikashon moderno pa komuniká ku otro i ehekutá e enkargonan.

Te ku awor direktiva a yama reunion general, pues un Konseho di Federashon, por lo menos kada luna pasa. En total 37 Konseho di Federashon a keda organisá durante e ultimo 5 añanan. Manera indiká durante e Konseho di Federashon presidentenan di sentronan di bario afiliá, asistí pa algun miembro di nan direktiva ta debatí riba puntonan di maneho di e direktiva di UNSEBAKO pa, eventualmente despues di votashon, e maneho keda fihá.  E promé Konseho di Federashon a tuma lugá dia 26 di yüli 2014 mientras ku e ultimo a tuma lugá dia 11 di mei 2019. E asistensia di dirigentenan di sentronan di bario na Konsehonan di Federashon ta di 24 miembro promedio. Tur partisipante ta miembronan di direktiva di sentronan di bario afiliá na UNSEBAKO.

Mas o menos 6 luna despues di a lanta fundashon UNSEBAKO a kuminsá ku e programa Interkambio di konosementu i eksperiensia. Esaki ta e trayekto den kua direktiva di UNSEBAKO ta organisá seshonnan pa dirigentenan di sentro di bario interkambiá konosementu i eksperiensia ku otro respekto posibel solushonnan pa ku difikultatnan ku por presentá na un sentro di bario. Durante ultimo 5 aña direktiva a organisá na tur  19 interkambio di konosementu i eksperiensia, i kada bes a trata un tópiko diferente. E asistensia promedio tabata di 26 dirigente na kada un di e aktividatnan aki. E prome interkambio di konosementu i eksperiensia ku a keda organisá a tuma lugá dia 10 di yanüari 2015 i a trata e tema “Struktura i aspektonan básiko pa un bon funshonamentu di un sentro di bario”. E interkambio mas resien a tuma lugá dia 13 di aprel 2019 mientras ku na e okashon ei a trata e tema “Lantamentu di un Instituto Nashonal pa desaroyo di forsa laboral”.

Damas i kabayeros, tumando nota di loke mi loke mi ta relatando aki, bo por konkluí ku en todo kaso komo organisashon UNSEBAKO no a para ketu, sino a proba su derechi di eksistensia hasiendo tur loke ta na su alkanse pa logra mihó funshonamentu di sentronan di bario di Kòrsou. Komo prueba di esei por sirbi e echo ku UNSEBAKO ta hañando rekonosimento i rèspèt den komunidat komo organisashon di kordinashon di sentronan di bario. Komo tal, ya diferente prestigioso organisashon a sa di yega na un forma di koperashon ku UNSEBAKO. Nos por menshoná p.e. Fundashon Prevenshon, Bureau Ombudsman, ReMaUní, Rode Kruis, Samenwerkende Fondsen, Kas di Beibel, Fundashon Piskadó nos ta i Direktorado di Kontrol di Riesgo i Maneho di Kalamidat……Eseinan ta algun di e organisashonnan ku ya ta trahando den koperashon ku UNSEBAKO den ehekushon di nan proyektonan den bario.

   

Logronan        

Awor, UNSEBAKO por bisa ku ela logra ounke ta parti di su meta despues di ta eksistí ya pa 5 aña?      

E kontesta ta SI..!. No tin duda!

Si nos konsiderá ku e meta prinsipal di UNSEBAKO ta pa “den union sentronan di bario mes yuda, sostené i motivá otro i interkambiá konosementu i eksperiensia , di manera ku huntu ta logra un bon funshonamentu di kada sentro di bario individual”, anto por bisa ku konfiansa ku definitivamente UNSEBAKO ta logrando su meta. Ku e esfuersonan genuino ku direktiva di UNSEBAKO a desplegá ultimo 5 aña ku aprobashon di su Konseho di Federashon i yudansa di su tim di sosten, nos tur por tuma nota ku ya kaba diferente sentro di bario ta funshonando mihó, i algun te hasta hopi mas mihó ku anteriormente. Esaki, naturalmente ta pa loke ta e parti ku e sentro di bario mes ta responsabel pe. Ta mas ku opvio ku e otro aktornan riba e tereno aki tambe mester asumí nan responsabilidat i kumpli ku nan parti pa por yega na funshonamentu ekselente òf por lo menos un funshonamentu optimal di sentronan di bario na Kòrsou.     

I aki mi ta referí spesífikamente na gobièrnu di Kòrsou i mas spesífiko e ministerio di Desaroyo Sosial, Labor i Bienestar i konsekuentemente tambe e fundashon ku a keda yamá na bida pa hustamente stimulá i sostené sentronan di bario, esta fundashon Sefba. Ta masha di lamentá ku e fundashon aki nunka a logra kumpli ku e meta ku ela keda lantá pe. Esaki a keda konfirmá tambe públikamente pa un minister di SOAW di pasado i tambe pa un parlamentario di pasado kende aktualmente ta okupando netamente e funshon di minister di SOAW. Fundashon Sefba a resultá mas bien un pesadia pa sentronan di bario. Mas o menos 3 luna pasá e aktual minister enkargá ku desaroyo sosial, labor i bienestar (SOAW) Sr. Hensley Koeiman a reakshoná “di shòk” despues di a tuma nota di tur e kehonan ku sentronan di bario a presentá respekto e (mal)funshonamentu di fundashon Sefba i su dirigentenan i a primintí den presensia di su konseheronan i e Konseho di Federashon di UNSEBAKO di duna dentro di 2 siman un reakshon por eskrito kon lo e solushoná e problemanan ei. Te ku awe UNSEBAKO lamentablemente no a tende mas di señor Koeiman, ni por eskrito, ni den ningun otro sentido.

UNSEBAKO sinembargo lo sigui insistí pa tur aktor envolví kumpli ku nan parti.

 

Finalmente, kiko ta e perspektivanan pa futuro?

Loke por spera di UNSEBAKO riba termino kortiku i termino medio largu ta lo siguiente:

  • UNSEBAKO lo kontinuá den diferente forma ku organisashon di su “Interkambio di Konosementu i Eksperiensia” pa dirigentenan di sentronan di bario;
  • UNSEBAKO lo sigui buska aliansa strategiko ku organisashonnan nashonal of internashonal kompetente  pa fasilitá ehekushon di sierto proyektonan importante;
  • UNSEBAKO mas i mas lo realisá proyektonan kumbiniente konhuntamente ku sentronan di bario afiliá na UNSEBAKO;
  • UNSEBAKO lo establesé pa algun area kuadronan básiko, denter di kua tur sentro di bario afiliá lo funshoná, semper teniendo kuenta ku e karakter i independensia di kada sentro, respekto p.e.: konstelashon di direktiva, programa anual di aktividatnan regular, presupuesto i tambe kuido i mantenshon di e sentro di bario.
  • UNSEBAKO lo traha dirigí pa yega na solushon duradero pa e problema di personal i e problema di seguridat na sentronan di bario afiliá;
  • UNSEBAKO lo stimulá sentronan afiliá na hasi mas uzo di e ekspertisio di e tim di sosten i asina aselerá e proseso di progreso na e sentro di bario i desde luego den e bario.

 

Danki pa boso atenshon.

 

 

 

This site uses Akismet to reduce spam. Learn how your comment data is processed.

%d bloggers like this: