Djarason 26-6-2019 sindikatonan (APRI, PWFC, SGTK, STK) a reuní ku e di dos kompania ku a mustra interes pa bishitá Refineria Isla.

Djarason 26-6-2019 sindikatonan (APRI, PWFC, SGTK, STK) a reuní ku e di dos kompania ku a mustra interes pa bishitá Refineria Isla. E kompania ku ta respondé bou di e nòmber “FIONA” a duna di konosé ku nan lo bin pa traha den seno di pas i esfera harmonioso.
“FIONA” a indiká ku sin trahadó no tin trabou i no tin Refineria, pues nan ta duna hopi balor na trahadornan i asta a bisa ku trahadornan di Refineria Isla ta HEROES. Heroes pa motibu ku apesar di e situashon aktual di Refineria, trahadornan a keda huntu i no a give-up. Tambe “FIONA” a mustra riba e echo ku mirando e parti fisika di nos trahadornan, nan no ta mira e nesesidat pa trese trahadó for di eksterior. “FIONA” a enfatisá ku si nan bira e próksimo operador, ta kantidat minimo di trahadó nan lo bin ku n’e ku lo funshoná huntu ku e tim di maneho aktual.
A pesar di no kier a papia muchu kos pa motibu di NDA, “FIONA” a indika ku nan ta habrí pa interkambiá riba tur aspekto pa yega na un kòntrakt pa bira e operador nobo di Refineria, asta a hasi menshon ku si nan mester sinta na mesa ku PDVSA nan ta dispuesto.
Finalisando “FIONA” ta suprayá ku nan ta interesá pa bira e próksimo operador i duna sindikatonan di konosé ku pa e próksimo reunion lo bai mas den detayes di nan plan pa ku Refineria.