Diskurso di presidente di UNSEBAKO mr Juny J. Sluis, na okashon di “Dia di Baluarte” na sentro di bario Brievengat dia 2 di yüli 2019 (dia di himno i bandera di Kòrsou).
Diskurso di presidente di UNSEBAKO mr Juny J. Sluis, na okashon di “Dia di Baluarte” na sentro di bario Brievengat dia 2 di yüli 2019 (dia di himno i bandera di Kòrsou).
Distinguido baluartenan, presidente sr. Rudsel Marchena i demas miembronan di direktiva di sentro di bario Brievengat, dirigentenan di Union di Sentronan di Bario di Kòrsou (UNSEBAKO), famianan di nos baluartenan, invitadonan, damas i kabayeros,
Pèrmitími na promé luga gradisí direktiva di sentro di bario Brievengat pa e invitashon pa ta presente na e aktividat importante aki i mas ainda pa e honor di por dirigí algun palabra na e honorable siudadanonan ku awe ta keda nombrá komo baluartenan pa sentro di bario Brievengat.
Pèrmití mi seguidamente na saludá i dirigí mi mes na e siudadanonan ku awe bario di Brievengat ta honra ku e status di baluarte pa bario di Brievengat i besindario, esta:
- Sra. Regina “Gina” Vlaun – Armanie
- Sra. Ivy Paris i
- Sr. Cedrig “Papa” Martha
Distinguido baluartenan, awe boso bario ta rekonosé bosonan komo e frente di fortifikashon, e bastion di bario di Brievengat i besindario. E bario ke pa boso sa ku ta konsiderá boso kada unu komo un muraya, un refuerso pa bario. Ta pesei awe e prestigioso sentro di bario di Brievengat ta honra boso ku e distinshon di baluartenan di e bario i desde luego di Kòrsou. Baluartenan ta personahenan ku semper nan alrededor por a konta ku nan.
Sra. Vlaun, sra Paris, sr. Martha, boso por ta tambe orguyoso ku e distinshon aki, komo ku e ta keda otorgá pa un organisashon serio i dediká i ku un trayektoria respetá di mas ku 60 aña, esta fundashon sentro di bario Brievengat.
Den mi kalidat di presidente di e Union di Sentronan di Bario di Kòrsou mi ta felisitá boso kada unu na nòmber di tur dirigentenan di sentronan di bario di Kòrsou afiliá na UNSEBAKO.
Damas i kabayeros, e trabou ku un sentro di bario ta hasi, ta trabou na base di komunidat. Esei ta impliká ku nos ku ta enkargá nos mes ku e trabou ei, diariamente ta den kontakto direkto ku tur e diferente gruponan den bario i komo tal regularmente ta risibí informashon for di e bario mes ken ta esnan ku den sierto ramo a distinguí nan mes durante un periodo largu. Pa e motibu ei nos por ta sigur ku personanan ku keda nominá komo kandidato pa baluarte di bario, ta tambe esnan mas indiká pa na e momento ei risibí e distinshon.
Ta pesei mi ta sigur ku e echo ku boso a keda nombrá awe komo baluartenan di Brievengat i besindario lo tin su influensia positivo riba e bario i su habitantenan.
Mi ta termina ku palabranan di felisitashon na direkshon di nos baluartenan Sra. Regina “Gina” Vlaun-Armanie, Sra. Ivy Paris i Sr. Cedrig “Papa” Martha i mi ta deseá nan tur kos bon pa futuro.
