REFINERIA DI KORSOU TA KOREGI ALEGASHONNAN VENTILA DEN PRENSA

REFINERIA DI KORSOU TA KOREGI ALEGASHONNAN VENTILA DEN PRENSA

Willemstad 8 di yüli 2019- E búskeda pa un partner stratégiko pa operá i manehá nos refineria ta kanando sigun plan.  Pa mas tardá dia 15 di yüli próksimo Refineria di Kòrsou (RdK) ta spera e asina yamá “non binding proposals” di e kompanianan ku ta deseá di sigui i yega na akuerdo di intenshon i negoshashon.

E trayekto ku RdK i e Project Management Organization (PMO)  ta kanando ta basá riba e úniko mandato ku gobièrnu a duna, esta mantené e refineria habri. E trayekto ta transparente i íntegro.

RdK a tuma nota ku na Kòrsou tin grupo i personanan ta plama informashon pa pueblo via medionan di komunikashon ku no ta kuadra ku realidat. Esaki ta krea un impreshon eróneo di e proseso ku RdK ta manehá.  RdK ta konsiderá ku ta na su lugá pa komunidat tin e informashon korekto i ke refutaá ponenshanan ku no ta kuadra ku bèrdat.

Den algun entrevista duná pa un Sr. Sparen, el a hasi algun alegashon ku bal koregí debí ku esakinan no ta korekto:

1. Refineria di Kòrsou (RdK) tin un mandato di Gobièrnu anto esei ta pa mantené refineria habri, no tin ningun otro mandato. Ta riba e mandato aki ta audit Refineria di Kòrsou. E intenshon no ta pa sera e refineria, manera Sr. Sparen ta menshoná.
2. RdK no tin grep riba e sistema hudisial. Pues, RdK no por disidí ku Sr. Van Kwartel mester ta será.
3. van Kwartel no a bai korte nunka pa bringa su retiro. Pues, no tin desishon di wes ku ta indiká ku korte lo a bai di akuerdo ku Sr. van Kwartel su retiro, manera menshoná. Dos otro empleado di RdK si a bai korte pa bringa nan retiro. Tur dos a pèrdè nan kaso.
4. Terenonan di RdK nunka a wòrdu bendí, manera alegá pa Sr. Sparen. RdK nunka tabata doño i nunka tabatin “erfpachtsrecht” riba Vèlt Salu. Un konsulta den e dokumentonan den registro di Kadaster no ta mustra ku Vèlt Salu ta di e persona ku Sr. Sparen ta pretendé.
5. E terenonan na Jetty 1 na Emmastad (tur sinku meetbrief), te riba e fecha di awe 8 di yüli 2019, ta propiedat di RdK i nunka a wòrdu bendí , manera Sr. Sparen a bisa.
6. E historia ku Jetty 1 lo a wòrdu kumprá pa un futuro plan pa deskargá den tankinan na Vèlt Salu lo ta físikamente imposibel. Jetty 1 no por tuma tankero pa deskargá den tankinan pa motibu ku e no ta hundu sufisiente i e máksimo largura di embarkashon permití pa mara einan #########. Sr. Sparen klaramente no konosé e parti operashonal marítimo di e refineria.
7. E “preferred bidder” ku na yanüari último a anunsiá di no ke sigui mas den e proseso di lisitashon, nunka a risibí di RdK un kondishon bou di kua e lo por a sigui ku negoshashon pa akuerdo di entendimentu (MOU.) Nunka no a yega na e promé draft di akuerdo di e MOU, manera menshoná dor di Sr. Sparen. Pues, nunka no a diskutí tampoko ku e “preferred bidder” e tèrmino di operashon ni tampoko montantenan di invershon.

RdK ta lamentá ku den nos komunidat tin yunan di tera ku a disidí konsientemente pa malinformá pueblo ku engaño i akusashonnan falsu. Esaki sigur no ta yuda e kousa komun pa mantené nos refineria operativo. Awor, mas ku nunka, ta importante pa pueblo di Kòrsou keda uní den e kousa aki. Akusashonnan falsu ku mentira ta krea polarisashon. RdK ta rechasá kategórikamente e práktika aki, mas ainda ora ta instigá pueblo pa konsiderá violensia komo un opshon pa solushon di problemanan ku no ta eksistí.