Klousura eksitoso di “Kunukito di Kas i di Bario” den Buena Vista

 Klousura eksitoso di “Kunukito di Kas i di Bario” den Buena Vista

WILLEMSTAD- Minister Suzy Camelia-Römer, Programa di urgensha den koperashon ku  Child First Foundation por mira bèk riba un eksitoso proyekto tras di lomba. Habitantenan, prinsipalmente muchanan di Buena Vista a risibí preparashon teorétiko i tambe práktiko kon pa tin un nutrishon balansá i tambe krea seguridat alimentisio pa medio di planta nan propio alimento.

Un notisia sumamente positivo ku a bin dilanti djasabra último na e klousura, tabata ku partisipantenan riba nan propio inisiativa a lanta “Kubuví” (Kunukito Buena Vista). E organisashon su meta ta netamente pa sigui promové agrikultura i nutrishon salú den e bario. Minister Camelia-Römer ta sumamente kontentu i kier a gradisí kada un partisipante pa nan pèrseveransia i konvikshon pa ku e programa i ta konta ku nan aporte pa sigui kompartí e konosementu ku demas habitantenan. 

Aktualmente e programa “Kunukito di Kas i di Bario” ta na Otrobanda/Rif i simultaniamente ta ranka sali djaluna 7 di yüli na e bario di Montaña. Pa kualke informashon adishonal por tuma kontakto na e e-mail kunukitodikasidibario@gmail.com òf na 4235803 durante ora di ofisina.