Instrukshon imponé riba gabinete Rhuggenaath pa konseho di Minister di Reino i akuerdo firma entre gabinete Rhuggenaath i gabinete Rutte II i moshon fecha 10 di yüni 2019, ku a ser aprobá unánimemente pa Parlamento
Na Presidente di Parlamento
Señor W. Millerson
P/a Wilhelminaplein # 4
PRESENTE
Willemstad, 15 di yüli 2019
Tópiko: Instrukshon imponé riba gabinete Rhuggenaath pa konseho di Minister di Reino i akuerdo firma entre gabinete Rhuggenaath i gabinete Rutte II i moshon fecha 10 di yüni 2019, ku a ser aprobá unánimemente pa Parlamento
Señor Presidente,
Frakshon di Movementu Futuro Kòrsou (MFK) ke hasi uso di su derecho konforme artíkulo 64 di nos Reglamentu di Ordu (RvO) i ta aserka bo persona pa yama un reunion públiko ku e punto di agènda ariba menshoná.
Frakshon di MFK a tuma nota ku gobiernu di Kòrsou a risibí di parti di konseho di Minister di Reino un instrukshon debí ku pa tres aña kaba gobiernu di Kòrsou no por a presentá un presupuesto den balansa.
Nos por a tuma nota tambe di deklarashon di parti di gobernantenan hulandes i tambe di CFT ku sifranan entrega dor di gobiernu di Kòrsou no tabata konfiabel i ku un biaha mas ta wòrdu menshoná kon defisiente atministrashon finansiero di gobiernu di Kòrsou ta.
Gabinete Rhuggenaath a firma un akuerdo di kolaborashon ku Hulanda, kaminda tambe ta ser indiká e medidanan ku tin ku tuma kontra di pueblo di Kòrsou pa por kubri e défisitnan ku bosnan gobernashon a krea den e último tres añanan ku a transkurí.
Ta bon pa gabinete Rhuggenaath bin Parlamento pa splika ta dikon ta bai entrega un opheshon na “Raad van State” kontra di e instrukshon si a firma un akuerdo di kolaborashon. Dikon no a tuma e pasonan nesesario pa kuminsá kana e kaminda ku Parlamento di Kòrsou a indiká den su moshon fecha 10 di yüni 2019, ku a ser aprobá pa tur 21 miembro, ku ta instruí gabinete Rhuggenaath pa kuminsá ku e proseso pa eliminá e leinan di konsenso.
Frakshon di MFK pa medio di esaki ta pidi Presidente di Parlamento invitá gabinete Rhuggenaath pa ta presente durante di e reunion aki, pa asina Parlamento por debatí riba e tópiko aki i fiha un posishon ku ta benefisiá pueblo di Kòrsou.
Atentamente,
_______________ _______________
Gilmar Pisas Charles Cooper
________________ _______________
Miro A. Dos Santos Meindert Rojer
