Tribon ta protehá den awanan di Boneiru.

Tribon ta protehá den awanan di Boneiru.

STINAPA a tuma nota ku te ainda ta piska tribon. For di 10-10-10 Tribon ta protehá pa lei den awanan di Boneiru.
STINAPA a risibí informashon ku tin piskamentu di tribon ta tumando lugá den awanan di Boneiru. STINAPA ke mustra riba e echo ku tribon ta protehá pa lei i ku ta estriktamente prohibí pa piska tribon i chuchu i tambe kumpra tribon.
Tur espesie di tribon i chuchu den awanan di Boneiru ta protehá pa leinan lokal i internashonal.
E motibu ku ta protehá tribon mundialmente ta ku nan ta den peliger di ekstinshon. Esaki pa motibu di peskeria industrial kaminda ta piska kantidat grandi di tribon djis pa nan alanan i kaba ta tir’é bèk bibu den laman lagé bai muri.
Tribon ta un piská hopi importante pa motibu ku e ta mantené e bida den laman den balansa i tambe salú. Ku destrukshon di e populashon di tribon nos ta destruí nos oséanonan i tambe nos mes eko-sistema ku ta sostené nos bida.
STINAPA ta enfatisá ku ta kontra di lei pa piska tribon i bende tribon.