Bishita di delegashon di miembronan di Parlamento di Kòrsou na reunionnan di Parlatino na Panama

Durante 31 mei pa 3 di yüni 2022, un delegashon di Miembronan di Parlamento di Kòrsou ku a asistié na reunionnan  di Parlatino na su sede prinsipal na Panama, kaminda diferente komishonnan di Parlatino a partisipá.  E Komishonnan tabata entre otro: Komishon di Seguridat Suidadano Kombate i Prevenshon di Narkotráfiko, Komishon di Terorismo i Krímen Organisá, Komishon  di Salu i Komishon di Derecho Humano, Hustisia i Polítika Carcelarias. E Miembronan di Parlamento ku a partisipá na e reunion aki tabata señores Amerigó Thodé,  Eduard Braam i Juniel Carolina di parti di frakshon di MFK, Sheldrey Osepa di frakshon di PNP i Quincy Girigorie di frakshon di PAR.

 

E temanan durante e reunionnan  ku a keda diskutí tabata, Derechonan Humano i Neuro teknologia i Prevenshon di Violensia Institushonal i Protekshon di Derechi Humano i Intervenshon Médiko pa huellas (vingerafdruk) digital, último aki a keda presentá riba petishon pa e delegashon di Kòrsou.

 

Durante e reunionnan na Parlatino, e delegashon di Kòrsou na nòmber di Parlamento a hasi uso di e oportunidat pa hasi entrega na sr. Licenciado Cesar Gonzales direktor di Sede di Parlatino un buki di Nos Areglo di Estado di Kòrsou ku a keda pone den e biblioteka pa asina tambe Parlamento di Kòrsou komo miembro di Parlatino  tin informashon den e sala di biblioteka den e sede di Parlatino na Panama.

 

E delegashon di miembronan di parlamento di Kòrsou ta konsiderá e temanan menshoná importante i lo hasi uso di e oportunidat di hiba esaki den diskushon den nan respektivo frakshonnan. Di e manera aki Miembronan di Parlamento di Kòrsou tambe por duna nan aporte  riba proyekto di leinan.

 

Eduard Braam

Miembro di Parlamento

Pa Frakshon di MFK

 

Kòrsou, 8 di yüni 2022

 

 

This site uses Akismet to reduce spam. Learn how your comment data is processed.

%d bloggers like this: