Hòrtamentu di koper a bolbe lanta kabes den diferente área. Aqualectra un bes mas ta atvertí riba e peliger pa esnan ku ta kometé e robo i e inkumbiniensia ku esaki ta trese tantu pa e habitante komo e kompania mes.

KOMUNIKADO DI PRENSA

Hòrtamentu di koper a bolbe lanta kabes den diferente área. Aqualectra un bes mas ta atvertí riba e peliger pa esnan ku ta kometé e robo i e inkumbiniensia ku esaki ta trese tantu pa e habitante komo e kompania mes.
———————————
Aqualectra den último dianan a bolbe bira víktima di e fenómeno di hòrtamentu di kabel di koriente i otro material di koper den su instalashonnan di koriente, loke ta laga e áreanan keda sin koriente pa tempu largu. Esaki ta resultá den trabou i gastu èkstra pa por restablesé e suministro pa esnan afektá.

Ademas Aqualectra ta atvertí pa e peliger serio dje hòrtamentu aki. Mester tene kuenta ku tantu e kabelnan i instalashonnan aki ta bou di tenshon ku vòltahe di koriente haltu ku sigur lo por tin konsekuensia fatal pa e malechor debí ku ta trata di koriente di 12.000 i 30.000 Vòlt.

Masha importante pa informá tambe, ku ora tin ladronisia di wayanan di koriente, Aqualectra ta keda perhudiká i tur hende den bario tambe ta keda afektá. Sea nan ta keda sin koriente pa un tempu largu òf e chèns pa risibí un “shòk” di koriente. Ora pèrdè koriente den bario mester notifiká Aqualectra mes ora, pasobra e problema ta mas grave ora nan hòrta koper for di e sistema di “ground”(aarding). Den kasonan aki e kliente ta keda ku koriente pues lo no ripara ku e sistema di seguridat personal a keda afektá den henter e bario, ku konsekuensha ku ora notifiká Aqualectra por ta lat kaba p.e ku koriente por dal un hende ora e ta baña na su kas. Ademas tin chèns ku aparatonan tambe por kima.

Aqualectra ta hasi un apelashon riba habitantenan pa yuda tira bista den bario na momentu ku bo pèrdè koriente den bario, si tin movementu straño ta sosedé den bo bario, habitantenan por yama polis òf Aqualectra na 08000135 mesora. Ta huntu so lo nos por yuda frena e problema aki.

Tambe ta spera di por risibí koperashon di e negoshinan ku ta kumpra koper i heru bieu pa notifiká polis ora e malechornan bin bende e koper hòrta.