PWFC, APRI, SEU, STO, STSK, BTG, STrAF, SITKOM, HIWA i SAP Solidaridat Sindikal: “Anochi di informashon ku presentashon di Dr. Emsley Tromp i Petishon Reunion ku Frakshonnan di Koalishon!”

PWFC, APRI, SEU, STO, STSK, BTG, STrAF, SITKOM, HIWA i SAP Solidaridat Sindikal: “Anochi di informashon ku presentashon di Dr. Emsley Tromp i Petishon Reunion ku Frakshonnan di Koalishon!” 

Den reunion ku sindikatonan di Solidaridat Sindikal un biaha mas a analisá i evaluá e tenshon den sektor laboral. Tambe a sigui profundisá riba e dokumentonan disponibel i nan konsekuenshanan. Den kuadro di esaki a disidí di organisá un anochi di informashon mas riba e tópikonan refineria Isla, Groeistrategie i Groeiakkoord, Aanwijzing i su konsekuensha pa klase trahadó. 

Anochi di informashon ku presentashon di Dr. Emsley Tromp Mirando ainda petishon pa mas informashon i mas profundisashon di e dokumentonan disponibel Solidaridat Sindikal a aserká señor Emsley Tromp èks direktor di Banko Sentral di Kòrsou i St. Maarten pa duna un análisis di e medidanan proponé den kuadro di e tópikonan ariba menshoná i nan konsekuansha pa e pueblo en general i e klase trahadó en partikular. Señor Tromp a aseptá pa duna su análisis den un presentashon pa Solidaridat Sindikal. Konsiderashon e importansha i embergadura di e asuntu aki pa komunidat di Kòrsou en general, Solidaridat Sindikal ta organisá un anochi di informashon kaminda señor Tromp lo duna su presentashon na pueblo di Kòrsou. E anochi di informashon aki ta tuma lugá djabièrnè awor 7or di anochi na edifisio di PWFC i ta invitá un i tur ku ta interesá. Pues djabièrnè awor señor Tromp lo duna su presentashon 7or di anochi na PWFC bou di ouspisio di Solidaridat Sindikal. Solidaridat Sindikal ta hasi uso di e espasio aki pa manda un invitashon pa tur organisashon sosial, sindikal, di hubentut i di penshonado. Pues un i tur ta bon biní! 

Petishon Reunion ku Frakshonnan di Koalishon Den kuadro di e posishon di Solidaridat Sindikal pa duna tur instansha konserní splikashon di su posishon a disidí pa pidi un reunion ku frakshonnan den Staten di e partidonan den koalishon esta Par, Man i PIN pa papia riba e situashon general di Kòrsou i e situashon laboral en partikular basá riba e medidanan anunsiá. 

Kòrsou 24 di yüli