Servisio di Transporte Públiko ta ofresé un mihó servisio na komunidat
Servisio di Transporte Públiko ta ofresé un mihó servisio na komunidat
Geplaatst op 6 Ougùstùs 2019 dor di Ministerio di Tráfiko, Transporte i Planifikashon Urbano
Willemstad – Minister di Tráfiko, Transporte i Planifikashon Urbano, Sra. Zita Jesus Leito huntu ku Servisio di Transporte Públiko (VV) ta informá ku a introdusí un sistema pa guia kliente, na un manera moderno i efektivo.
Pa duna mihó servisio na e kliente ku ta bishita VV pa entre otro laga kùr e vehíkulo, i atendé asuntunan di transporte públiko a introdusí e asina yama “klantbegeleidingsysteem”. Esaki ta un sistema ku ta regulá e servisio ku e kliente a bin apliká pe na VV . Pues e kliente ta haña un number pa e akudí na e bali indiká pa por atendé su petishon.
Ku esaki VV ta spera ku servisio na e kliente ta kana muchu mas lihé, fásil i ku tantu e kliente komo e empleado ta keda satisfecho.
Un di Minister Jesus-Leito su prioridatnan ta pa mehora VVRP su servisio na kliente, dor di modernisá prosesonan, sòru pa transparensia i baha tempu di espera. P’esei Minister Jesus-Leito ta felisitá Servisio di Transporte Públiko pa e atkisishon aki i ta sigui traha pa mas adelanto.
