Ku Instrukshon òf sin Instrukshon Ratonnan ta sigui kome for di e Keshi Pueblo di Kòrsou ta haña Wiri Wiri di Pan komo kuminda

Ku Instrukshon òf sin Instrukshon Ratonnan ta sigui kome for di e Keshi Pueblo di Kòrsou ta haña Wiri Wiri di Pan komo kuminda

 

No por tin mas duda ku e meta di gabinete Rhuggenaath ta pa via di konstrukshonnan dudoso i kompanianan di nan finansiadó i amigunan polítiko nan enrikesé nan mes i nan amigunan.

 

Konseho di Minister di Reino a imponé un Instrukshon (Aanwijzing) riba Gabinete Rhuggenaath pero apesar di esaki, miembronan di e gabinete aki ta krea konstrukshon i bin ku akshonnan kreativo pa e fiesta di duna miónes na nan amigunan por kontinuá.

 

Ta parse ku e gabinete aki no tin rèspèt mas pa pueblo di Kòrsou i tampoko nan no tin kompashon ku 21.2% di nos poblashon ta sin trabou, ku 52% di pueblo ta gana salario mínimo òf ménos. No ta importá gabinete Rhuggenaath ku pais ta pasando den un reseshon ekonómiko i ku presupuesto di Kòrsou tin un défisit den aña 2019 di 112 mion florin i ku ta pueblo mester bai paga esaki pa medio di medida.

 

Banko Sentral a kaba di bati bèl, ku défisit riba nos balansa di pago a yega un suma astronómiko di 469.1 mion florin. No ménos ku dos siman pasa pueblo a tuma nota ku un Minister di e gabinete aki kier a bai hasi un fiansa di 200 mion na un konsorsio di banko ku ta bon amigunan di e gobiernu aki na un interes di 5%. Pa estilo di “speed di jet” hasi nan mes riku i sigui hiba pueblo den pobresa.

 

E siman aki a sali na kla ku gabinete Rhuggenaath a neglishá empresanan i fundashonnan ku pa hopi aña ta funshoná den e area di Hotèl i Turismo.

 

Kuchi kuchi a duna Impacto e tarea pa duna kurso na futuro empleadonan ku lo mester bai funshoná den area di Hotèl i Turismo. Pueblo bo por imaginá bo mes ku un Uitzendburo” ta wòrdu enkargá pa duna kurso den sektor di Hotèl i Turismo. Impacto lo risibí pa kada persona un suma di 3000 mil florin i 300 persona lo partisipá na e kurso aki kaminda Impacto no tin ningun konosementu den dunamentu di training i esaki no ta Impacto su area di trabou. Djis tuma nota di nan registro di Kamara di Komersio.

 

Gabinete Rhuggenaath ta bai regalá Impacto kasi 1 mion florin, miéntras ku tin skolnan ku por duna e kursonan aki i e sèn ta keda den enseñansa i por huza esaki bek pa optimalisá e skolnan aki.

 

Pero Gabinete Rhuggenaath ta skohe pa “Very Good Friends” promé i interes di pueblo ta bin despues.

 

Pueblo di Kòrsou habri wowo i tuma bon nota, esaki lo no ta e último intento pa saka bo plaka di belasting pa nan enrikesé nan mes. E keshi lo kaba pronto gabinete Rhuggenaath, djis sigui trapa riba pueblo di Kòrsou. Pasenshi no tei pa semper !!

 

Kòrsou, 14 di ougùstùs 2019

 

Gilmar Pisas

Parlamentario pa MFK

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: