‘eLEARNING PILOT PROJECT’ A BIRA REALIDAD NA SCOL BASICO CACIQUE MACUARIMA
Prome Minister Evelyn Wever-Croes:
‘eLEARNING PILOT PROJECT’ A BIRA REALIDAD NA SCOL BASICO CACIQUE MACUARIMA
Cu e proyecto aki, ta pone innovacion den educacion central
Diabierna 16 di augustus tawata otro dia cu Gabinete Wever-Croes ta marca historia y e biaha aki den enseñansa. Prome Minister Evelyn Wever-Croes tempran diabierna mainta a bishita Scol Basico Cacique Macuarima cu ta e prome scol na Aruba cu a cuminsa cu e eLearning Pilot Project.
Na luna di april e aña aki, den colaboracion cu Minister di Enseñansa, Armando Lampe, Gabinete Wever-Croes a lansa un proyecto piloto innovativo den educacion primario pa stimula e 21Century Skills for di un edad hoben caba. Scol Basico Cacique Macuarima a wordo scogi pa asina desaroya un programa di innovacion den un manera nobo y unico.
E proyecto a wordo realisa den un tempo hopi cortico. Cabesante di e scol, señora Rachelle Croes Caster a vocifera cu nan mes no a spera cu den un tempo asina cortico e proyecto di innovacion aki lo a wordo realisa pero nan ta hopi contento cu esaki a bira un realidad pa e aña escolar aki mes. “E muchanan riba e prome dia di scol a yega haya e sorpresa asina bunita aki”, señora Croes Caster a duna di conoce.
