Relato Konsulta ku Promé Minister Rhuggenaath 20 ougùstùs 2019

Relato Konsulta ku Promé Minister Rhuggenaath 20 ougùstùs 2019

Geplaatst op 20 Ougùstùs 2019 dor di Ministerio di Asuntunan General i Promé Minister

Aki ta sigui un relato di e konsulta ku prensa tabatin ku Promé Minister Rhuggenaath dia 20 di ougùstùs 2019, ku tópiko: Refineria.

Propósito di e konsulta awe tabata pa duna un rekapitulashon di loke a bin dilanti durante reunion di Parlamento ayera (djaluna 19 di ougùstùs) i brinda e oportunidat pa prensa hasi pregunta direktamente na Promé Minister Rhuggenaath.

Esaki ta forma parti di e komunikashon habrí i direkto ku Gobièrnu a bin ta hiba for di momentu ku a start ku e proseso di buska un posibel operador nobo pa refineria. Esaki a base di e mandato (proyekto Arawak) ku Gobièrnu a duna Refineria di Kòrsou (RdK) pa buska un operador segun un proseso transparente. Pa sigurá kontinuashon di e refineria, invershonnan nesesario mester tuma lugá, mester hisa kapasidat di e planta den su totalidat i alsa normanan di seguridat i medio ambiente ku ta kumpli ku standartnan internashonal.

Meta i deseo prinsipal di kana un proseso transparente ta ku den futuro (por ehèmpel aki 30 aña) por wak bèk i mira detayadamente kon e proseso a kana.

Nos refineria ta den un situashon hopi fragil na e momentunan aki. E retonan ku Refineria Isla ta han’é konfrontá na e momentun aki ta:

  1. Transakshonnan finansiero difísil pa motibu di e sanshonnan di Merka;
  2. Mantenshon regular di e planta i seguridat den refineria;
  3. Rekursonan limitá pa kumpli ku debernan finansiero.

Transakshonnan difísil
E sanshonnan di Merka ta impedí transakshonnan finansiero ku i pa PDVSA. Esaki ta stroba entre otro kompanianan Merikano pa hasi negoshi ku PDVSA. Konsekuentemente esaki tin un impakto negativo riba funshonamentu di refineria.

For di aña pasá, ámtenarnan a hasi varios biahe pa Washington pa duna splikashon ekstenso di e impakto ku e sanshonnan aki tin pa Kòrsou, ku no tin nada di haber ku e situashon na Venezuela, i asina trata na minimalisá e daño pa nos. Esaki a resultá den un lisensia ku OFAC (Office of Foreign Assets Control) a duna RdK, CRU i Curoil na luna di mei 2019 i ku ta vigente te ku yanüari 2020. Sinembargo, e lisensia aki no ta yuda trese solushon kompleto, ya ku e ta aplikabel pa krudo ku ya pa tin almanesé na Kòrsou.

Mantenshon regular i seguridat
Refineria no ta kumpliendo ku regla i standartnan di mantenshon i seguridat. E lastu tin riesgo tantu pa seguridat di personal komo seguridat di pais (pa besindario i Kòrsou en general). Esaki entre otro a bin dilanti den un análisis ku a laga un instansia independiente, esta Veiligheidsregio Rotterdam Rijnmond, hasi na 2018 i 2019. A konstatá varios defisiensia i esnan ku refineria a ahustá no a resultá sufisiente. Ta importante pa, ku ayudo di Gobièrnu, bin ku plannan pa evitá insidentenan i sa kon pa ‘scale up’, manehá akaso esei resultá nesesario.

Rekursonan limitá pa kumpli ku debernan finansiero
Refineria su situashon finansiero ta pone ku e no por kumpli ku su pagonan i responsabilidatnan. Pa algun tempu kaba refineria no ta pagando e ‘Take or Pay fee’ na CRU, ku na e momentunan aki ya a yega un montante di 69 mion florin na pago retrasá. Ta premirá ku esaki por hasta yega un montante di 99 mion na luna di sèptèmber aki.  Tambe refineria a indiká di por kumpli ku pago di salario te ku yüni 2019. Atraves di esfuersonan di RdK i Gobièrnu a sòru pa por kumpli ku pago di salario te ku sèptèmber. No opstante esaki ta tratando na ekstendé e posibilidat aki te ku fin di aña.

Na e momentunan aki Gobièrnu ta tumando e pasonan nesesario pa un posibel siguiente biahe pa Washington. Ayera tabatin netamente un reunion ku sindikatonan (PWFC i Apri) riba esaki. Meta ta pa pidi Merka mas espasio i yega na un lisensia di OFAC ku si ta inkorporá fasilitashon di transakshonnan finansiero i suministro di krudo ku ta yuda tene e planta operashonal, hasi mantenshonnan nesesario i paga salarionan.

E kaminda ta difísil, pero unu direkto ku nos mester kana. Mester keda ku e fokùs nesesario i pa e motibu ei mes PMO di RdK (ku ta konsistí di un tim di eksperto Yu di Kòrsou) a pidi pa risibí e espasio, trankilidat i konfiansa nesesario di komunidat pa por sigui hasi su trabou.

Gobièrnu ta uni su mes na esaki dor di hasi un petishon importante na komunidat pa duna espasio, depositá konfiansa, kere den nos mes i uni tras di e meta di refineria. Awoki nos ta drentando un periodo hopi determinante kaminda mester yega na un akuerdo di entendimientu, eskoho di operador a base di skrutinashon di ofertanan ku a risibí i finalmente firmamentu di un kontrato na luna di novèmber 2019.

E logro no lo ta di Promé Minister, pero di nos tur, pa henter Kòrsou.

Kontesta riba preguntanan di prensa:

  • No ta eskluí niun kompania ku ker a entregá un oferta. Pues tampoko ta eskluí PDVSA. Si ta asina ku tur kompania mester pasa dor di un asina yamá ‘due diligence’ kaminda mester kumpli ku sierto kriteria. Esaki atrobe den kuadro di un proseso transparente kon a yega na un operador (nobo) pa refineria.
  • Gobièrnu den pasado a duna informashon tokante kon e proseso di búskeda pa un operador pa refineria a kana, pero ta resultá ku e informashon no tabata sufisiente pa komunidat. Awoki a opta pa kuminsá duna mas detaye pa sigui evitá esaki.
  • Gobièrnu no ke antisipá riba e senario kaminda un posibel operador nobo ta bai traha ku PDVSA komo terser partido. Si Gobièrnu ta i lo sigui mustra Venezuela (akaso bin un operador nobo) ku nos portanan ta habrí pa hasi negoshi si situashon di Venezuela normalisá / drecha. Esaki teniendo kuenta ku e relashonnan di trabou ku tin for di aña ’85. Tambe ku Venezuela ta e pais ku reserva di krudo mas grandi na mundu.
  • Importante ta awoki, sea bin un operador nobo òf no, ku ta hasi e mihó eskoho pa Kòrsou. I pa esei mester wak bon ki topi di operador nos ke, kedando ku mente kla, un kurason habrí i perspektiva positivo.
  • Si, lo bai atendé di Correspondent Banks tambe na momentu ku biaha pa Washington atrobe. Esei ta keda un punto agenda. E desaroyonan rondó di Correspondent Banks tabata un di e promé indikashonnan ki impakto e sanshonnan por a bai tin riba nos situashon. Awoki Kòrsou ta trahando riba un ‘Risk Self-Assessment’ pa kontrolá e parti aki. Intenshon ta pa dado momentu por organisá mishon pa Washington, konsistiendo di tur ‘players in the field’ manera bankonan lokal tambe, di forma ku por demostrá kon ta dil aki ku e situashon pa asina yega na un posibel eksonerashon.
  • E backlog di mantenshon ku tin na e momentunan aki di por lo ménos 1,5 pa 2 aña ta un di e puntonan di atenshon mas grandi pa nos. Mester traha duru na yega na un sierto nivel ku por ofresé un posibel operador nobo den kaso di un transishon.
  • E PMO nobo a traha un skema ku awor aki ta kanando segun plan. E chèns pa keda kla ku un operador promé ku fin di aña ta mustra grandi. A sera konosí ku delegashon di dos kompania potensial. Tin ofertanan serio riba mesa.
  • Na tur momentu Gobièrnu huntu ku RdK lo sigui ‘brief’ e sindikatonan di tur desaroyo. Na nan pa kontribuí di un manera importante tambe na momentu di negoshamentu durante luna di sèptèmber.
Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: