Situashon di Sehos relashoná ku servisionan ku mester wòrdu duna na pueblo di Kòrsou

Na:      Minister di GMN

Señora Suzanne Camelia-Römer

PRESENTE

 

Willemstad, 21 di ougùstùs 2019

Tópiko: Situashon di Sehos relashoná ku servisionan ku mester wòrdu duna na pueblo di Kòrsou

 

Señora Minister Camelia-Römer,

Señora Jacinta Constancia, Parlamentario pa frakshon di Movementu Futuro Kòrsou (MFK), ta preokupá ku e situashon aktual di Sehos. A base di artíkulo 25 insiso 1 di nos Areglo di Estado (Konstitushon), gobièrnu ta karga responsabilidat pa kuido di salu di kalidat pa pueblo di Kòrsou.

 

Sinembargo tin un situashon agudo na Sehos, ku tin di tene kuenta kuné pa garantisá e kuido aktual te ora yega na apertura di e Hospital Nobo. Ta konosí ku a para tur operashon na Sehos debí ku no tin material pa por ehekutá e operashonnan. Algun siman atras tambe Sehos no tabata dispone di remedinan ku ta nesesario pa e pashèntnan ku ta kedando den Sehos.

 

Segun informashon ku frakshon di MFK ta dispone di dje ta, ku e gran parti di spesialistanan ta preokupá ku e situashon aktual di Sehos debí ku ainda no por ofresé servisio kompleto na pueblo di Kòrsou i sigur no konforme artíkulo 25 insiso 1 di nos Areglo di Estado (Konstitushon).

 

Esaki ta trese kuné ku pueblo di Kòrsou, kende tin ku risibí e servisionan ku gobièrnu ta responsabel p’e, no ta haña servisio optimal relashoná ku salubridat, miéntras ku no tin klaridat kon Sehos tin ku sigui funshoná finansieramente.

 

E situashon di Sehos ta hopi serio, nos no mester lubidá ku Sehos ta nos instituto ku durante di mas ku 156 aña a para na kabes di kuido den e area di salubridat i mester tuma akshonnan konkreto pa garantisá kuido pa medio di Sehos te ora Hospital Nobo ta operashonal.

 

Konforme artíkulo 96 di Reglamentu di Orden di Parlamento, nos ta hasi e siguiente preguntanan na Minister di señora Minister Camelia-Römer enkargá ku salubridat públiko;

 

1. Kual ta e fecha indiká ku Sehos por kuminsá ehekutá operashon na pashèntnan atrobe?

 

2. Te ku kua fecha Sehos mester ta operashonal i kon gobièrnu ta pensa di salvaguardá ku Sehos ta keda funshoná pa asina gobiernu kumpli ku su responsabilidat konforme artíkulo 25 insiso 1 di nos Areglo di Estado (Konstitushon)?

 

 

 

3. Minister por informá Parlamento kua ta e ròl di spesialistanan pa por garantisá seguridat den kuido?

 

4. Ki ròl e “Medische Stafbestuur” di Sehos tin den e eksigensianan pa por garantisá seguridat di kuido?

 

5. Kompanianan ku ta entrega remedi i produktonan na Sehos a risibí pago pa asina nan por entrega remedi i produktonan na Sehos pa por trata e pashèntnan ku ta kedando den Sehos aktualmente?
6. Kon Minister lo bai solushoná e problemanan finansiero di Sehos te ku e fecha ku nan mester keda operashonal?

 

Rekordando Minister Camelia-Römer riba e obligashon ku ta ankra den nos Areglo di Estado pa gobièrnu duna miembronan di Parlamento tur informashon rekirí i tambe ku den e protokòl firma entre Parlamento i Gobièrnu, ku kontestanan riba preguntanan hasi dor di miembronan di Parlamento mester wòrdu kontesta no mas tardá ku denter di seis (6) siman. Nos ta keda pendiente pa Minister su kontestanan.

 

Atentamente,

 

 

 

Jacinta Constancia

Miembro di Parlamento

Pa frakshon di MFK