Minister Plenipotenciario pa Aruba na Washington DC Mrs Joselin Croes ARUBA SU ACEPTACION NA VARIOS ORGANISACION INTERNACIONAL TA HOPI POSITIVO Y GRANDI
Minister Plenipotenciario pa Aruba na Washington DC Mrs Joselin Croes
ARUBA SU ACEPTACION NA VARIOS ORGANISACION INTERNACIONAL TA HOPI POSITIVO Y GRANDI
Minister Plenipotenciario pa Aruba na Washington DC Mrs Joselin Croes durante su bishita cortico na Aruba entre otro pa duna update na Conseho di Minister riba su trabounan, a duna di conoce cu Aruba su aceptacion na varios organisacion internacional ta hopi positivo y grandi. Esaki ta hopi importante pasobra, segun Minister Plenipontciario Croes, esaki no semper tawata asina.
Pa añanan largo Aruba y Corsou tawata wordo mira como parti di Reino y pa e motibo aki Hulanda so tawata representa e islanan aki na tur e reunion y conferencianan. Aruba no tawata wordo mira como un pais autonomo den Caribe. Sinembargo esaki a cambia den e uiltimo añanan y cada biaha mas Aruba ta hañando invitacionnan como pais autonomo pa casi tur organisacion internacional manera PAHO, IMF, WB, OAS entre otro.
Minister Plenipontciario Croes ta representa Aruba na e organisacionnan aki y asina tin e oportunidad di gara e informacion direct y no via Hulanda. Aruba ta hañando hopi reconocemento internacional especialmente pa loke Aruba ta haciendo riba tarima di medio ambiente. E prohibicion di plastic ta un topico cu ta wordo discuti hopi ya cu Aruba ta un di e tiki islanan cu a tuma esaki na serio y a implementa e ley.
E movicion di ‘waste to energy’ y e proteccion di nos lama na unda Aruba a bin cu un ‘Bio Marine Park’ ta topiconan hopi interesante y mirando cu Aruba ta bayendo den e direccion aki ta duna e oportunidad pa Aruba haña cobertura internacional. Diferente instancianan manera United Nations y/of IMF ta invita Aruba como orador pa nan conferencianan.
Aña pasa tambe, Minister Plenipontciario Croes a duna di conoce, Aruba a bira miembro di GLISPA. Esaki ta un “Global Island Partnership” hunto cu tur e islanan den pacifico cu ta duna e oportunidad di siña tur loke e otro islanan ta haciendo den medio ambiente.
Luna pasa tambe Aruba tawata e host pa e prome ‘Island Professional Network Gathering’ cu ta un network di tur e profesionalnan bibando na Washington DC cu ta trahando riba e islanan. E topiconan a encera coralnan, blue economy, y e problemanan cu islanan ta enfrenta manera cantidad di turistanan y e construccionnan anadando cu ta afecta nos medio ambiente.
Tambe Aruba ta forma parti di US/Caribbean 2020 Partnership. Ta traha riba asuntonan cu ta importante pa Caribe manera: proteccion di frontera, disaster natural y su efectonan, economia di islanan chikito, e vulnarebilidad di islanan chikito, Venezuela, corupcion y integridad, problemanan di hubentud, Isis drentando Caribe, problema di hubentud y hopi mas.
Minister Plenipotenciario Joselin Croes a duna di conoce cu portanan ta habriendo mas y mas pa Aruba poniendo nos riba e plataforma internacional riba diferente tereno y ta crea mas oportunidad pa nos pais riba tur tema menciona.
