Kuerpo Polisial no por ehekutá nan trabou di Sirbi i Protehá, debí ku hopi outo di e kuerpo ta para daña den garashi di polis

Na Minister di Hustisia

Señor Quincy Girigorie

PRESENTE

 

Willemstad, 20 di ougùstùs 2019

Tópiko: Kuerpo Polisial no por ehekutá nan trabou di Sirbi i Protehá, debí ku hopi outo di e kuerpo ta para daña den garashi di polis

 

Honorabel Minister Girigorie,                                                                                                                 

 

Meta di kuerpo polisial ta pa Sirbi i Protehá komunidat. Outonan di polis, ta un di e medionan pa logra e meta aki. E vehíkulonan di polis, mester ta den bon kondishon i bon ekipá, pa sirbi i protehá. 

Ora esaki ta e kaso, polis por duna servisio i kumpli ku e nivel di seguridat ku e siudadano tas pera di kuerpo polisial. 

 

Frakshon di MFK a tuma nota, ku tin diferente outo di polis para daña den garashi di polis. Resientemente minister di hustisia a entregá sinku (5) outo so, na kuerpo di polis! Esaki no ta sufisiente, pa por remplasá e kantidat di outonan, ku ta pará daña den garashi di polis. Konsekuensia di esaki ta, ku e kuerpo di polis, no por sirbi i tampoko protehá komunidat.

 

Frakshon di MFK ta nota, ku polisnan tin di atendé hopi kaso últimamente i suskrito ta hopi preokupá, ku e situashon ariba deskribí i ta spera solushon riba término kòrtiku pa esaki.

  

Frakshon di MFK a base di e preokupashon ariba deskribí, ta aserká Minister di Hustisia pa medio di artíkulo 96 di Reglamentu di Órden, ku siguiente preguntanan;

 

  1. Minister ta na altura di e vehíkulonan di kuerpo polisial ku ta para daña na garashi di polis?

 

  1. Minister por informá Parlamento, kuantu outo ta daña i kua ta nan defektonan?

 

  1. Minister por informá Parlamento, den kua aña a kumpra e outonan ku ta para daña na garashi di polis?

 

  1. Minister por informá Parlamento, kua ta e motibu(nan), ku e outonan di polis ta keda pa basta tempu den garashi sin por wòrdu drecha?

 

  1. Minister por informá Parlamento, si ta bèrdat ku ta bai kumpra outonan pa kuerpo polisial?

 

  1. Tabatin un destaho públiko pa kumpramentu di e outonan nobo aki i kua ta e agensia ku a gana e destaho públiko?

 

  1. Si no tabatin un destaho públiko, kon e proseso di kompra a kana i serka kua kompania ta bai kumpra e outonan i for di kua post di presupuesto lo paga esakinan?

 

  1. Minister por informá Parlamento, kua ta e maneho, relashoná ku parke di outo di kuerpo polisial?

 

  1. Minister por informá Parlamento, kon grandi e parke di outo di kuerpo polisial ta, di kuantu outo nan ta dispone i kuantu ta propiedat di gobiernu, kuantu ta di lease i kuantu ta di hur?

Frakshon di MFK ta spera ku Minister Girigorie  tuma bon nota di e di e karta aki i ku minister kontestá e preguntanan den e tempu stipulá pa nos Reglamento di Orden i tambe e protokòl firma entre gobièrnu i Parlamento di Kòrsou.

 

Atentamente,

 

___________________

Juniël Carolina

Miembro di Parlamento

Frakshon di MFK

 

Na: Presidente di Parlamento di Kòrsou

Señor W. Millerson

Wilhelminaplein # 4

PRESENTE

 

Kòrsou, 20 di ougùstùs 2019

 

Apresiabel Señor Millerson, 

 

Pa medio di e karta aki, hasiendo uso di artíkulo 96 di reglamentu di órden 

di Parlamento, mi ke pidi bo persona pa dirigí e karta athunto na Minister Quincy Girigorie enkargá ku Hustisia, ku preguntanan ku mi persona ta hasi na e minister konserní.

 

Danki pa e koperashon.

 

Atentamente,

        

Juniël Carolina

Miembro di Parlamento

Frakshon di MFK

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: