RESUMEN DI SIMAN DI GABINETE WEVER-CROES 18 aug – 24 aug 2019

RESUMEN DI SIMAN DI GABINETE WEVER-CROES

18 aug – 24 aug 2019

 

Siman a habri cu bisita di Prome Minister Wever-Croes y Minister Rudy Lampe na Colegio San Hose na Santa Cruz, pa mira e avansenan cu ta tumando luga pa cu e proyecto di renobacion di e scol cu por cierto ta preparando pa celebra nan 80 aña di existencia na 2020. E trabounan ta canando lihe, a basha e ‘kleine kant’ abou y a instala klasnan modular espacioso.

 

Prome Minister Wever-Croes a bishita tambe scol Cacique Macuarima pa mira con e proyecto di Innovacion ta avansando. Ya tur e klasnan tin e smart board “C touch” y e klasnan tin airco. E proyecto lo wordo finalisa pronto cu instalacion di demas ekipo. E docente y alumnonan ta hopi contento cu e avansenan,

 

Prome Minister Wever-Croes y Minister Lampe a presencia e dia importante cu un grupo di hoben special ta cuminsa nan enseñansa avansa cu Home Schooling na Paradera di juffrouw Charlotte y juffrouw Stephany. Nan ta haya les hunto cu otro muchanan, pues e prome paso di Inclusion a wordo tuma. E muchanan special tabata masha contento.

 

Prome Minister Wever-Croes a bishita Club Kibrahacha pa pasa saluda nos grandinan y combersa poco cu nan. Rotary Club Aruba a haci un presentacion na Prome Minister Wever-Croes di e proyecto di Kibrahacha. Presidente di Rotary, America Barrios a presenta tambe un publicacion di e 75 aña di trabounan di Rotary na Aruba.

 

Siman pasa Gabinete Wever-Croes a presenta e relato financiero di e prome 6 lunanan di aña 2019 y a wordo trata den Parlamento di Aruba. E resultado ta positivo. E desaroyo di gastonan y di entradanan ta segun presupuesto. Esaki ta muestra cu e esfuerso grandi di Gabinete Wever-Croes di aplica un maneho financiero prudente y estricto, ta dunando resultado.

 

Gabinete Wever-Croes y pueblo di Aruba cu honor a presencia e desvelo di Avenida dedica na nos gran politico yui di tera Nelson O Oduber cu a dedica 36 aña na politica y durante su trayectoria a haci hopi pa nos Pais, a ricibi e honor di por conta cu un avenida dedica na su nomber, pa nos Pueblo por recorda pa semper su legado na bienestar di Aruba. Masha pabien na Nel y famia cu e bunita homenahe aki y danki pa sirbi nos Pais na un manera ehemplar y integro.

 

San Nicolas Business Association (SNBA) a presenta e 1st San Nicolas Business Summit, cu participacion activo di Ministernan di Gabinete Wever-Croes den cual a duna e vision di nos Gabinete pa San Nicolas. Un tremendo cumbre enfocando riba e vision di desaroyo den San Nicolas.

 

Minister Glenbert Croes a duna relato na Parlamento di e prome mita di aña, y di e Sociaal Crisis Plan, cumpliendo asina cu e palabracion di informa Parlamento periodicamente riba e avansenan.

 

Minister Glenbert Croes a subi avion rumbo Hulanda pa por presenta e raportahe di e avancenan di Aruba su crisisplan social na instancia- y autoridadnan Hulandes

 

Minister Glenbert Croes a reuni cu representantenan di Ministerio di Defensa ofreciendo tur apoyo na e proyecto piloto: WERVEN IN HET WEST pa duna nos hobennan na Aruba un oportunidad na Hulanda pa posibel careranan den ehercito, Forsa Aereo, Marina y Koninklijke Marechaussee cu ta Polis Militar.

 

Minister Glenbert Croes a cuminsa cu su reunionnan pa informa Gobierno di Hulanda di e progreso den e implementacion di e Crisis Plan Social (SCP). Gobierno di Hulanda ta un partner importante di Gobierno di Aruba hunto cu full e Sector Social na Aruba den SCP. E mandatario ta gradici Minister Wouter Koolmees, Director pa asuntonan Internacional di su Ministerio sr Roel Gans y nan team pa e oportunidad di por a informa nan riba e avancenan cu metanan asina importante pa henter Aruba su comunidad.

 

Minister Glenbert Croes a gradici Staatsecretaris Paul Blokhuis y su staf pa e oportunidad di por a informa e Secretario di Estado riba e avancenan di e crisisplan social di Aruba SCP. Un plan cu tin 31 proyecto den pleno ehecucion.

 

E mandatario di Asunto Social y Labor di Aruba a presenta e avancenan logra cu implementacion di e crisisplan social di Aruba SCP na e Ombudsman Nacional di Hulanda sr. Reinier Zutphen kende a demostra di ta hopi bon informa di Aruba su situacion. Otro tremendo reunion pa cual e mandatario a expresa su gratitud. Ombudsman ta e Defensor di Pueblo, un instituto reconoci y respeta nacional- y internacionalmente.

 

Minister di Husticia, mr. Andin Bikker, a inicia un proceso di Request di Expression of Interest pa haya un sistema di tracking di prisonero conoci como “Inmate tracking system, cual lo yuda monitoria e prisoneronan via un sistema technologico avansa cu ta wordo uza na Merca y rond mundo. Cu un sistema asina lo por sa constantemente unda un prisonero ta via un arm- of enkelband. Asina cu e prisonero purba bandona su cel den orario cu e ta supone di ta den e cel, si e purba bandona e area di recreo of si e purba kita e arm- of enkelband, e ta wordo detecta inmediatemente.

 

Minister di Husitcia, conhuntamente cu coleganan di Gabinete Wever-Croes, tabata den Parlamento dialuna y diamars caminda a duna un presentacion amplio di e logronan pa cu e maneho stipula. Asina a resalta cu a logra reduci e indice di crimen violento arma substancialmente, e presencia di Cuerpo Policial rond di Aruba y den areanan turistico a wordo aumenta, a introduci e helicopter pa vigila nos isla y frontera, pronto e radar nobo pa KPA lo ta un realidad, y a duna un relato con ta atendiendo cu e retonan sin precedente door di e situacion na hermana pais Venezuela.

 

Minister di Husticia a atende e cumbre organisa pa San Nicolas Business Association, caminda sector priva y publico a reflexiona con ta bay yuda reactiva e economia pa pariba di brug.

 

Minister di Husticia a asisti na un ocashon special caminda un grupo grandi di Cuerpo Policial a haya reconocimento pa nan añanan di servicio.

 

Diaberna Conseho di Minister, a base di proposicion di Minister di Husticia, a aproba cierto invercionnan adicional cu ta rekeri cu urgencia pa cu e infrastructura di KIA.

 

Minister di Enseñansa Rudy Lampe a habri e siman cu bishita na Colegio San Hose hunto Minister President pa e prome dia di scol despues di a pasa den un temporada intensivo di a atende cu e infrastructura deteriora. E comision di mayor tambe tabata presente hunto cu Directora di SkOA. E cabesante a mustra satisfaccion cu e trabao realisa y tambe e muchanan tabata contento di por haya les den airco den e modularnan moderno. 

 

Meimei di siman a presenta den Parlamento e gastonan presupuesta y a mustra unda tur e inversionnan a bay y ta trata di un lista largo di proyecto cu a atende a pesar di e situacion financiero limita. 

 

Minister Lampe a haya presentacion di Cruz Cora pa loke ta e situacion di muchanan cu tin derecho riba educacion pero cu no ta risibi esaki, y p’esei ta den preparacion pa uza e fondo aproba di Hulanda pa e problematica di refugiado. 

 

A cera e siman cu e entrega di Beibel den Prenchi, traduci y ilustra den Papiamento di Aruba, pa scolnan preparatorio cu awor a cuminsa cu Scol Arubano Multilingual, na Minister Lampe door di Nederlandse Bijbelgenootschap di Hulanda y Cas di Beibel di Corsou.

 

Minister Dangui Oduber a haci bishita na Proyecto Gateway 2030 pa un spantenbier di e edificio nobo di Utilidad na aeropuerto unda e mandatario a duna un discurso. E edificio di Utilidad aki ta forma parti di e proyecto di expansion Gateway 2030. Gateway 2030 ta un proyecto cu tin un inversion general di 500 miyon florin y cu ta genera hopi trabou.

 

Minister Dangui Oduber tawata presente na e prome San Nicolas Business Summit. Sigur un tremendo iniciativa caminda Gobierno y sector priva a presenta diferente proyecto tangible pa San Nicolas, y a presenta e siguiente proyectonan: Proyecto di Baby Beach, Rodgers Beach, Reapertura San Nicolas Visitor Information Center, Island Festival, Proyecto di Imsan. Minister Dangui Oduber tin un vision y cu hecho ta demostra cu nos ta ehecutando e vision aki.