Concurso di pintamento pa muchanan di scol basico cu tema: “STIMA BO CACHO”
Concurso di pintamento pa muchanan di scol basico cu tema: “STIMA BO CACHO”
E comision di e plan nacional recien instala cu e meta pa atende cu e problema di cacho na Aruba, ta actualmente den fase inicial di preparacion, y ta lansa, danki na idea di Sr. Rodney Solognier (KPA), un concurso di pintamento “Back-to-School” cu tema “Stima bo cacho”. Muchanan por participa gratis den e concurso y asina haya sa mas di Aruba su ‘Ley di Cacho’. Educando nos muchanan ta crea un base solido di doñonan cu ta cuida nan mascotanan di forma responsabel. Alabes ta stimula adultonan pa forma parti di e educacion di e forma aki ora nan yuda splica e mucha algun punto basico di e ‘Ley di Cacho’.
E concurso aki ta un accion special pa muchanan entre 6 y 12 aña (scol basico), pero si un mucha di 6e klas tin mas di 12 aña tambe e por participa.
E pintura mester ta uno original y creativo, y mester tin contenido cu ta ilustra un of algun di e puntonan di e ‘Ley di Cacho’. Esnan cu participa por “download” e formulario na specialprojectsaruba.org y mester scoge den tres tema pa ilustra: (1) cacho den cura, (2) cana cu cacho na un “leash”, (3) cacho na su veterinario.
FECHA
E concurso a cuminsa oficialmente dialuna 26 di augustus 2019 – Dia Internacional di Cacho – y e ultimo dia pa entrega e pintura ta diaranson 25 di september 2019 na e MFA mas cerca, of via email: specialprojectsaruba@gmail.com. E premionan lo wordo entrega riba dia di bestia, diabierna 4 di october.
CACHO DEN CURA, LEY E TA!
E ley di cacho ta ensera:
* Cacho den cura:
* Sea e cura ta cera
* Sea e cacho ta mara na un “looplijn” of e ta den un “ren”
* Ora di sali cu bo cacho e mester ta na un leash
* Cuida bo cacho: dun’e awa, cuminda, dak pa por sconde pa solo of awa, y bay dokter di bestia cun’e
Ta aña di famia y bo mascota tambe ta forma parti di famia. Dun’e su respet, cuido, y e atencion cu e merece.
