NOS A DRENTA E SIMAN KAMINDA NOS SELEKSHON NASHONAL LO ENFRENTÁ HAITI DIA 7 DI SÈPTÈMBER DEN SDK, 6’OR DI ATARDI! DJALUNA 2 DI SÈPTÈMBER NOS HUNGADÓNAN TA YEGA KÒRSOU!
NOS A DRENTA E SIMAN KAMINDA NOS SELEKSHON NASHONAL LO ENFRENTÁ HAITI DIA 7 DI SÈPTÈMBER DEN SDK, 6’OR DI ATARDI!
DJALUNA 2 DI SÈPTÈMBER NOS HUNGADÓNAN TA YEGA KÒRSOU!
Djaluna, 2 di sèptèmber 14:30 pm gran parti di nos hungadónan residensiá den eksterior lo pisa suela di Kòrsou pa asina djòin nos hugandónan lokal pa kontinuá ku e training i preparashonnan pa nos partido kontra Haiti di djasabra 7 di sèptèmber binidero den Stadion Ergilio Hato pa 6’or di atardi. Entrenamentunan ta kuminsá djamars, 3 di sèptèmber i ta kontinuá te ku djabièrnè 6 den Stadion Ergilio Hato.
Durante e siman aki lo tin diferente aktividat pa animá un i tur pa ku e tremendo partido aki.
Djamars lo tin un rueda di prensa na Blue Bay kaminda nos selekshon ta hospedá semper i
djaweps 5 di sèptèmber anochi lo tin un enkuentro ku nos selekshon e biaha aki durante Punda Vibes pa pueblo kompletu por sera konosí ku nos hungadónan. Tambe tin oportunidat pa kumpra karchi, suèter, shal i tur loke ta na benta pa apoyá nos selekshon den e wega kontra Haiti.
Durante e siman aki lo tin rifa di karchi na diferente radio lokal i via nos medianan sosial pa asina tur amante di bon futbòl por gana.
Karchinan ta moviendo duru pesei mes kumpra bo karchi trempan pa despues bo no lamentá!
Karchinan ta optenibel na FFK bou di ora di ofisina, Beep Beep, Botika Mampuritu, pòmp di gasolin Sta Maria, tur sentro di pago Tu y Yo i na 4th of July snèk na Barber.
E preisnan pa e diferente paketenan pa sekshonnan ta lo siguiente:
- VIP ta kosta Fl.250,- pa ámbos partido i Fl.150,- pa un partido (inkluso konsumo);
- Bou di tribunanan kubrí ta Fl.50,- pa ámbos partido i Fl.30,- pa un partido
- Tribunanan no kubrí ta Fl.30,- pa ámbos partido i Fl.20,- pa un partido
- Mucha te ku 12 aña ku 60+ ta paga Fl. 15,- pa ámbos partido i Fl.10,- pa un partido den sekshon general
Portanan ta habri for di 3’or di atardi, kòrda yega trempan pa evitá e tráfiko i semper sigui òrdu di seguridat.
E kolekshon nobo di suèter di nos selekshon, ku ta Nike original, a yega FFK!
Aparte di e suèternan nos a risibí ‘jacket’ i karson di ‘traingspak’ largu tantu pa mucha komo pa adulto na diferente ‘size’ i koló.
E preisnan di nos kolekshon nobo di merkansia di nos selekshon nashonal ta lo siguiente;
- Jacket adulto (neon hel) fl.150,-
- Jacket mucha (neon hel) fl.125,-
- Suèter adulto (neon hel òf blou) fl.100,-
- Suèter mucha (neon hel òf blou) fl.85,-
- Karson di ‘trainingspak’ adulto (blou skur) fl.85,-
- Karson di ‘trainingspak’ mucha (blou skur) fl.75,-
- Shal di nos selekshon fl.25,-
E ‘size’ nan di mucha ta kore di XS te L miéntras di adulto ta kuminsá na S i ta yega te XXL.
Tur esaki optenibel na FFK bou di ora di ofisina.
E ora 0 ta yegando i nos selekshon ta sigui konta ku bo, komo e di 12 hungadó, pa sigui apoyá i sostené nan
Nos ta topa 7 di sèptèmber, 6’or di atardi den Stadion Ergilio Hato!
1 sèptèmber 2019
