A INKLUI DOS SISTEMA TROPIKAL MAS..PRONOSTIKO DJAMARS 3 DI SEPTEMBER
Pronóstiko di tempu pa Kòrsou i bisindario bálido te djárason atardi 18:00 o.l, 4 di sèptèmber 2019.
Kompilá: djamars 3 di sèptèmber 2019, 17:00 o.l. (21:00 UTC).
Tempu: Awe tardi i anochi shelu lo ta tiki nublá i wer lo keda seku. Durante di mayan, shelu un poko mas nublá por resultá den un tiki áwaseru lokalmente.
Temperatura máksimo lo alkansá 34 ºC, i temperatura mínimo di 28 ºC.
Solo ta sali 06:25 i ta baha 18:45 o.l.
Bientu: Direkshon generalmente ost i moderá te basta fuerte; forsa 3 pa 5 (12 pa 39 km/ora, 7 pa 21 nudo). Ráfaga de bes en kuando fuerte prinsipalmente den dia; forsa 6 (40 pa 50 km/ora, 22 pa 27 nudo).
Situashon general: Den sobrá di awe no ta antisipá muchu kambio den e wer i e sekura lo kontinuá. Despues, den e próksimo dianan sin embargo, momentonan kòrtiku ku mas nubia por okashoná algu di áwaseru riba partinan limitá di e isla. Ademas di esei, e fluho di bientu lo supla ménos fuerte awe nochi pa despues un bes mas esaki bira mas fuerte mayan den dia.
Kondishon di laman: Trankil te moderá ku altura di olanan serka di 1 meter (2 pa 5 pia).
Sistemanan signifikante di wer tropikal: Orkan Dorian ta sigui move nortwèst, miéntras bientunan a kuminsá na bira mas fuerte na e parti di kosta oriental di e península di Florida. Awe djamars mèrdia a desaroyá riba Golfo di Méksiko un tormenta tropikal i e a haña e nòmber Fernand. Tambe tin sierto potensial pa unu mas desaroyá riba e parti oriental di Osean Atlántiko. Nigun di e sistemanan tropikal aki ta un menasa pa Kòrsou.
Fenómeno spesial: Ningun.
Perspektiva te djaweps atardi: Por lo general parsialmente nublá ku chèns breve pa algu di áwaseru.
Meteorólogo: Coffie
