Anochi di selebrashon ku, “Kòrsou ta un nashon bou di Dios”!  Dia 6 di sèptèmber próksimo, di 7 pa 9 or di anochi, riba Brionplein

Anochi di selebrashon ku, “Kòrsou ta un nashon bou di Dios”! 

Dia 6 di sèptèmber próksimo, di 7 pa 9 or di anochi, riba Brionplein

 

Kòrsou, 26 di ougùstùs 2019 

Tantu den nos Himno Nashonal komo den Preámbulo di Konstitushon di Kòrsou nos ta rekonosé e soberania di Dios. P’esei nos ta bin huntu pa selebrá Su grandesa ku kanto, baile i músika i pa gradisí Dios públikamente ku nos ta: “Un Nashon Bou di Dios”.

For di mei 2017 e organisashon Instituto  Embahador di Reino ta organisá riba tur promé djabièrnè di luna di 6 pa 9 or di anochi un alabansa na Dios riba Brionplein. Awor den koperashon ku Konseho di Iglesianan di Kòrsou i Kas di Beibel, un anochi di alabansa i selebrashon ta keda organisá, na kual evento henter pueblo di Kòrsou ta invitá,  pa komo ún nashon yama danki na Dios pa loke El a hasi kaba i pa gradisi’E di antemano, pa loke E ta bai hasi.

E anochi lo no ta unu di orashon ni di diskurso òf predikashi pero di eksklusivamente alabansa i selebrashon. Di 7 pa 7.30 ta e intenshon pa na un momentu den kuadro di Trias Polítika,  Kas di Beibel hasi entrega di un Beibel di Estudio na Papiamentu, na Minister Presidente di Kòrsou sr. E Ruggenaath, Presidente di Parlamento di Kòrsou sr. W. Millerson i Presidente di Korte Komun di Hustisia di Aruba, Kòrsou, Sint Maarten Bonaire, Sint Eustatius i Saba, sra. mr. E Saleh. Despues ta sigui alabansa i selebrashon di 7:30  te 9’or.

E evento históriko aki ta tuma lugá riba Brionplein, komo e sentro di komersio i di enkuentro kultural, na entrada di nos haf i kaminda nos bandera nashonal ta establesé representando nos grandesa komo pueblo.

Nos lo bini huntu pa  gradisí Dios pa Su grasia, pas i amor i rekonosé ku ta E ta esun ku lo hiba nos pais na e nivel ku El a kre’é pa ta. 

Un pais úniko, yen di potensial ku ta konsistí di hendenan di diferente nashonalidat bibando den harmonia i kapas pa uni forsa pa alkansá un futuro briante.

Tema di e selebrashon ku músika, kanto i baile dirigí na Dios aki ta: “Kòrsou Un Nashon Bou di Dios”.

Nos ta ekstendé un invitashon na komunidat di Kòrsou kompleto, pa bin selebrá e Rei di tur reinan huntu komo un pueblo, dia 6 di sèptèmber próksimo di 7-9 or di anochi riba Brionplein i eksperensiá presensia di Dios riba Kòrsou, segun nos ta entregá nos mes den Su man pa un Kòrsou próspero i felis.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: