Minister Plenipotenciario na Washington mr. Joselin Croes BISHITA DI MINISTER PLENIPOTENCIARIO NA WASHINGTON CERCA GOBERNADOR DI ARUBA

Minister Plenipotenciario na Washington mr. Joselin Croes

 

BISHITA DI MINISTER PLENIPOTENCIARIO NA WASHINGTON CERCA GOBERNADOR DI ARUBA

 

Durante e bishita cortico di trabou di Minister Plenipotenciario pa Aruba na Washington DC, Joselin Croes tawatin e honor di a logra haya un audiencia cu Gobernador Señor Alfonso Boekhoudt. 

 

Topiconan cu a keda discuti cerca Gobernador di Aruba tawata Venezuela y politica na Merca, pero primordialmente Blue Economy y locual esaki ta significa pa Aruba. E topico di Blue Economy, cu ta significa un economia sustenibel cu ta proveni di bo lama, ta un topico cu mas y mas ta hayando oido pasobra mundo ta realisa cu si nan no traha riba dje awor, aki 20 aña nos ta mucho laat. 

 

Nos planeta ta consisti di 70% di lama. Lama ta contene 97% di tur awa riba mundo, dus 7.5 billion di hende ta depende di e lama pa por come, pa por hala rosea y pa por drey nan economia. Den caso di Aruba nos ta depende pa 90% di nos turismo y dus nos lama. E ta sumamente importante pa nos como Arubiano realisa esaki y pa nos proteha nos lama.

 

Conforme e cifranan di WorldBank, pa 2050 tin mas plastic den lama cu lo tin pisca. E microplastic’nan den nos laman ta wordo comi door di pisca y esaki ta super peligroso pa nos mesun salud si nos come e microplastic’nan aki. 

 

Aruba berdad ta bendiciona pa no ta den e area di horcan pero mayoria isla den Caribe ta depende totalmente di tin coral y rifnan fuerte pa yudanan proteha nan costanan. Pa Aruba esaki tambe ta importante, especialmente si nos kier keda un destinacion pa buceado. 

 

Aruba ta riba e bon caminda cu e plastic ban policy, waste-to-energy facility, ceramento di Parkietenbos, build with nature, proteccion di coralnan, pero ta importante pa educa nos chikitonan riba e importancia di nos laman. 

 

Conersacionnan cu Gobernador tawata hopi ameno y Minister Plenipotenciario Joselin Croes lo keda den contact cu Gobernador riba e tema aki cu ta di hopi interes pa ambos.