Parlamentario Curtley Obispo: E aktual Gobièrnu, por bira e promé Gobièrnu di Pais Kòrsou ku ta entrega un kuenta anual di Pais Kòrsou na tempu.

E aktual Gobièrnu, por bira e promé Gobièrnu di Pais Kòrsou ku ta entrega un kuenta anual di Pais Kòrsou na tempu.

Parlamentario Curtley Obispo den e reunion di Parlamento di Kòrsou di dia 21 ougùstùs 2019, a sigui mustra i aksentuá riba e importansia di dunamentu di kuenta i rason na tempu dor di Gobièrnunan di Kòrsou pa medio di kuentanan anual (“jaarrekening”). Esaki a base di nos Lei di Komptabilidat di Kòrsou i tambe nos Areglo di Estado di Kòrsou, nos lei máksimo. E realidat duru ta ku kuentanan anual di Pais Kòrsou over di añanan 2010 te ku 2017, nunka no a wòrdu entrega na tempu dor di Gobièrnu nan di turno na Parlamentonan di Kòrsou di turno. Ta p’esei den kuadro di kumpli ku e leinan ariba menshoná i tambe den kuadro di e trabou di kontròl parlamentario, parlamentario Curtley Obispo a skibi dos karta na Minister di Finansa, señor Kenneth Gijsbertha. E promé karta riba 24 aprel 2018 ku tópiko: Trayekto di fiha kuenta anual (“jaarrekeningtraject”) di Pais Kòrsou. Karta ku a wòrdu kontesta dor di Minister Finansa, dia 27 ougùstùs 2018. I e di dos karta tabata riba 4 aprel 2019 ku tópiko: Trayekto di fiha kuenta anual 2018 di Pais Kòrsou. 

Durante e reunion, parlamentario Curtley Obispo, a sigui mustra ku e aktual Gobièrnu di Kòrsou por bira e promé Gobièrnu di Pais Kòrsou, ku ta entrega un kuenta anual di Pais Kòrsou na tempu na Parlamento di Kòrsou. P’esei e la hasi atrobe e petishon pa e aktual Gobièrnu di Kòrsou: pa hasi tur esfuerso pa ta e promé Gobièrnu di Kòrsou ku ta kumpli i ta entrega un kuenta anual  na tempu, no mas tarda desèmber 2019. Tur esaki a base di nos Lei di Komptabilidat di Kòrsou i nos Areglo di Estado di Kòrsou. Den e kaso aki e kuenta anual 2018 di Pais Kòrsou. Kual ta nifiká tambe ku e kuentanan anual pendiente di añanan 2016 i 2017, tambe mester wòrdu entrega na Parlamento di Kòrsou. Ku e meta pa e aktual Parlamento di Kòrsou den su periodo 2017-2021, por hasi su trabou di kontròl parlamentario na tempu. Pa asina pa promé biaha den historia di Pais Kòrsou, un Parlamento di Kòrsou por kontrolá i tambe por fiha kuentanan anual (2017 i 2018), ku tin haber ku e aktual periodo di Gobernashon 2017-2021. 

Parlamentario Curtley Obispo tambe durante e reunion a hasi e siguiente preguntanan na Minister di Finansa: (1) Ki dia Parlamento di Kòrsou lo risibí e “nota naar aanleiding van het verslag”, pa asina e kuenta anual 2014 di Pais Kòrsou por wòrdu trata i fiha den un reunion publiko di Parlamento di Kòrsou?.  (2) Kontrolaria General a kontrolá kaba e kuentanan anual 2016 i 2017 di Pais Kòrsou i a publiká su rapòrtnan den luna di Yanüari 2019. Pregunta lógiko ta: (a) ku si e kuentanan anual 2016 i 2017 a bai Konseho di Konsulta (“Raad van Advies”) pa haña konseho?, (b) Ki dia nan a bai Konseho di Konsulta?, (3) Ki dia parlamentario Curtley Obispo lo risibí kontesta di su karta di 4 aprel 2019 ku tópiko: Trayekto di fiha kuenta anual 2018 di Pais Kòrsou?