BIN DUNA HOMENAHE I TOPA NOS HUNGADÓNAN DJAWEPS 5 DI SÈPTÈMBER DEN PUNDA DURANTE PUNDA VIBES!
BIN DUNA HOMENAHE I TOPA NOS HUNGADÓNAN DJAWEPS 5 DI SÈPTÈMBER DEN PUNDA DURANTE PUNDA VIBES!
Djaweps 5 di sèptèmber durante Punda Vibes na Wilhelminaplein pueblo di Kòrsou kompletu ta keda kordialmente invitá pa bin topa i duna homenahe na nos hungadónan, kampion di King’s Cup 2019. For di 7’or di anochi lo tin benta di karchi, suèter, shal i tur artikulo di nos selekshon i pa 8’or di anochi nos selekshon lo tei na Wilhelminaplein pa un enkuentro ku e públiko presente i risibí un homenahe chikí na man di Gobièrnu di Kòrsou i CTB pa e logronan den King’s Cup i Gold Cup 2019. Despues di e parti ofisial aki nan lo keda sosialisá ku tur hende i lo tin oportunidat pa saka potrèt, gana karchi i disfrutá di e bon ambiente ku tin semper durante Punda Vibes.
Lamentabelmente tur karchi di tribuna kubrí a kaba serka nos pues lo no tin benta di e sekshon aki mañan anochi. Karchinan di VIP i tribunanan no kubrí si lo tin na benta huntu ku e artikulonan di nos selekshon.
E preisnan pa e diferente paketenan pa sekshonnan ta lo siguiente:
- VIP ta kosta Fl.250,- pa ámbos partido i Fl.150,- pa un partido (inkluso konsumo);
- Tribunanan no kubrí ta Fl.30,- pa ámbos partido i Fl.20,- pa un partido
- Mucha te ku 12 aña ku 60+ ta paga Fl. 15,- pa ámbos partido i Fl.10,- pa un partido den sekshon general
E kolekshon nobo di suèter di nos selekshon, ku ta Nike original, tambe lo ta na benta mañan, djaweps 5 di sèptèmber durante e enkuentro ku nos selekshon.
Aparte di e suèternan nos tin tambe ‘jacket’ i karson di ‘traingspak’ largu tantu pa mucha komo pa adulto na diferente ‘size’ i koló.
E preisnan di nos kolekshon nobo di merkansia di nos selekshon nashonal ta lo siguiente;
- Jacket adulto (neon hel) fl.150,-
- Jacket mucha (neon hel) fl.125,-
- Suèter adulto (neon hel òf blou) fl.100,-
- Suèter mucha (neon hel òf blou) fl.85,-
- Karson di ‘trainingspak’ adulto (blou skur) fl.85,-
- Karson di ‘trainingspak’ mucha (blou skur) fl.75,-
- Shal di nos selekshon fl.25,-
E ‘size’ nan di mucha ta kore di XS te L miéntras di adulto ta kuminsá na S i ta yega te XXL.
Awe ‘nochi nos selekshon ta tin su segundo seshon di training na SDK, ku a kana hopi bon. Lamentabelmente 2 hungadó di nos a haña leshon i no ta forma parti mas di nos selekshon.
Pues Shermaine Martina ku Jurich Carolina a kai afo i na nan lugá Bryan Anastacia ku Gersinio Constancia a djòin nos selekshon pa nos wega di djasabra 6’or di atardi kontra Haiti den Stadion Ergilio Hato.
Preparashonnan ta kontinuá i nos hungadónan ta konta ku bo, komo e di 12 hungadó!
Nos ta topa mañan anochi den Punda!
