Ministerio di SMN ta informá ku… Komunidat por ta trankil paso no tin sentido pa nos teme pa e malesa di Tripel E aki na Kòrsou

Ministerio di SMN ta informá ku…

Komunidat por ta trankil paso no tin sentido pa nos teme pa e malesa di Tripel E aki na Kòrsou


Willemstad – Relashoná ku un publikashon ku a sali resientemente den medionan sosial tokante e malesa di Encephalitis en partikular EEE (Eastern Equine Encephalitis), Ministerio di Salú, Medio Ambiente i Naturalesa ta partisipá lo siguiente.

Tin 3 diferente sorto di e malesa di Encephalitis konosí na Merka. E nòmbernan di e malesanan ta WEE (West Equine Encephalitis), Venezuelan Equine Encephalitis i Eastern Equine Encephalitis. E Encephalitis ku a keda publiká resientemente den medionan sosial ta e EEE òf tambe yamá Tripel E.
Tripel E ta aparesé na parti oriente di Merka. E ta presente den e área di golfo di Mexico te na estado di New Jersey (parti Atlántiko). Te asina leu ku por a keda verifiká Tripel E no ta un malesa ku a keda deskubrí òf señalá aki na Kòrsou. Tampoko ta probabel ku e malesa aki por establesé den Karibe òf na Kòrsou debí ku e faktornan pa propagá e malesa no ta presente. Ounke tin indikashon ku e ta drenta Karibe sali bèk. 


Tambe mester tin presente e sangura Culiseta Melanura ku ta esun primeramente responsabel pa kousá e malesanan dor ku e ta transportá e vírùs. E sangura aki tampoko ta presente na Kòrsou. 

Pa e sangura aki por eksistí i sobreviví e mester ta den áreanan ku e kondishon klimatológiko ideal, pues e mester ta áreanan no tropikal. Kòrsou ta un isla tropikal. Por ehèmpel e larva di e sangura Culiseta Melanura mester di awanan friu pa e por krese aden i bira un sangura adulto.

Dado momento un kaso di Tripel E keda importá, esta si un hende infektá ku e vírùs  bishitá nos isla, e malesa no por sigui propagá, pasombra kabainan por ehèmpel ku por hunga un ròl den transmishon den e siklo ta vakuná, pues no ta apto pa e siklo por kontinuá.

Ku e informashon aki Ministerio di Salú, Medio Ambiente i Naturalesa ke trankilisá komunidat ku no tin sentido pa nos teme pa e malesa di Tripel E aki na Kòrsou.
Lòs di esaki, en todo kaso ta keda importante pa públiko no stimulá produsimentu di sangura. Kòrda pèrkurá pa eliminá tur kos ku ta retené awa. Den nos siguiente komunikado nos lo informá tokante di e sangura Aedes Aegypti ku si ta eksistí aki na Kòrsou i ta transportadó di e vírùsnan ku ta kousa Dengue, Chikunguya i tambe Zika.

 

Pa mas informashon por tuma kontakto ku Ministerio di Salú, Medio Ambiente i Naturalesa riba number di telefòn 462-1028.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: