Parlamentario Rennox Calmes ” Enbes di buska aserkamentu, mas i mas Gobièrnu ta distansia su mes di pueblo”
Parlamentario Rennox Calmes
” Enbes di buska aserkamentu, mas i mas Gobièrnu ta distansia su mes di pueblo”
Parlamentario Calmes sigur no ta sorprendé ku Gobièrnu ta buskando otro opshon pa restringí demostrashon. Manifestashon ta un derecho sagrado ku ta ankra pa medio di tratadonan riba e nivel internashonal dor di Nashon Uni. Kòrsou tin ku kumpli ku nan. Kuminsá tòrnu òf intento pa demoralisá pueblo pa hasi uso di su derecho ta señal di diktadura.
Nos por kòrda ku algun siman pasa Gobièrnu a manda e lei “Uitzonderingstoestanden” na Parlamento pa tratamentu. Durante tratamentu di e Lei aki Sr. Calmes a trese su posishon bon kla dilanti i a bai kontra e partinan kaminda ke limitá pueblo di ekspresá su opinion, limitá demostrashon i asta limitá libertat di prensa. Resientemente Gobièrnu a usa Kuerpo Polisial pa anunsiá un aserkamentu otro ora un hende òf instansia ta desea di manifestá. Hasiendo uso di e Lei “Openbare Manifestaties” KPC a trese dilanti puntonan ku mester kumpli ku ne promé tene un manifestashon. Ta bisto ku énbes di mustra kon por fasilitá un manifestashon tabata purba na demoralisá posibel demostrashonnan dor di mustra kon KPC lo por asta para un manifestashon.
Ta bon pa pueblo sa ku e Lei ta menshoná ku no tin ku pidi permit na outoridat pero tin ku méldu si (e asina yama “kennisgeving”). Literalmente ta stipula “geen sprake van een vergunningsvereiste voor het houden van een samenkomst of betoging.” Mester kumpli ku algun punto básiko manera dia/orario i semper mester soru pa durante un manifestashon limitá entre otro gritunan di diskriminashon i/òf ekspreshonnan provokativo (“opruiende”). Ta berdat ku mester méldu na outoridat 48 ora promé ku e manifestashon tuma lugá, pero asta pa esaki outoridat por desvia pa kaso nan eksepshonal (“bijzondere gevallen”).
Gobièrnu tin ku mira e manifestashonnan aki komo un forma di komunikashon ku pueblo. Ta bisto ku e “show” nan ku Gobièrnu ta laga pasa na TV i presentá esaki komo si fuera pueblo ta wòrdu enbolbí no tin efekto. Calmes:”Ta di lamenta ku Gobièrnu kier spanta i demoralisá pueblo énbes di buska aserkamentu”. Den nos region nos por a mira ora purba sera boka di pueblo kiko por sosode. Nos mester ta orguyoso i balorá e fundamentonan di nos demokrasia. Den union nos tin ku resolvé nos problemanan énbes di instigá mas.
