Kòrsou ban sigui pa dilanti

Kòrsou ban sigui pa dilanti

 

Artíkulo 54 di Areglo di Estado Kòrsou ta regulá ku e aña parlamentario ta habri tur aña riba e di dos djamars di luna di sèptèmber. Esaki ta parti di e sistema demokrátiko di nos pais. Ku apertura di aña parlamentario 2019-2020 presidente di Parlamento di Kòrsou sr. Millerson a kumpli ku e mandato aki. E Libertat ku  demokrasia ta brinda meresé selebrashon, un kantidat di pais i hende rònt mundu no tin esaki.

 

Durante di e apertura di e aña parlamentario Gobernador sra. George- Wout a hiba su diskurso anual den representashon di gobièrnu. Un liña kòrá den esaki ta Kòrsou su forsa pa ‘Kai, Lanta i Sigui.’ Apesar di e retonan di e último añanan, bo por tuma nota di un resistensia i determinashon di nos pais pa sigui pa dilanti ku firmesa. I komo frakshon di PAR nos por solamente suprayá esaki.

 

Frakshon di PAR ta mira ku espektativa e aña parlamentario 2019-2020. Espektativa ku Kòrsou lo tin un partner stratégiko pa refineria di Kòrsou. Ku e konstrukshon di e hospital nobo CMC lo yega su fin. Ku sektornan ekonómiko, manera entre otro di turismo, servisio internashonal, eksportashon di produktonan lokal i evento lo sigui krese.

 

Parlamentarionan di PAR lo sigui enfoká riba e trabou di Parlamento basa riba e huramentu ku a keda hasí 11 di mei 2017. Esta hasi Gabinete Rhuggenaath preguntanan riba temanan aktual, informá nos komunidat i traha riba proyektonan di lei. Proyekto di lei ku ya pa e aña aki lo keda finalisá ta e                                         ‘Deurwaarderslandsverordening’, lei pa prohibí intimidashon seksual na boka di trabou i tambe e dekreto ministerial pa registrá baby ku nase sin bida. Tur tres proyekto ku ta konta ku e sosten di e ministernan envolví. 

 

PAR komo e frakshon di mas grandi i ku tin e honor di por rekonosé presidente di Parlamento sr. Millerson komo miembro di  frakshon di PAR, lo sigui salbaguardiá ku ta respetá e instituto di Parlamento, su trabou i su reglanan. Nos lo no permití i lo denunsia na tur momento atentado kontra di Kòrsou su demokrasia.

 

Kòrsou kompleto ban sigui pa dilanti huntu. Uniendo nos talento, konosementu i kreatividat na bienestar di nos pueblo.  Ban selebrá nos demokrasia. 

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: