Minister Ruiz-Maduro orador invita na e simposio organisa pa Banco Central di Aruba ‘Fostering Economic Resilience in Small Islands States’

Minister Ruiz-Maduro orador invita na e simposio organisa pa Banco Central di Aruba ‘Fostering Economic Resilience in Small Islands States’

 

ORANJESTAD – Recientemente Minister di Finansa, Asuntonan Economico y Cultura tabata un orador invita na e simposio ‘Fostering Economic Resilience in Small Islands States’ organisa pa Banco Central di Aruba (CBA). Durante di e simposio CBA a lansa e publicacion ‘Fostering Economic Resilience. From roots to routes’. E mandatario a subraya cu e publicacion di Banco Central ta den linea cu e Maneho Economico 2019-2022. ‘Un Economia Fuerte y Resiliente’ cu Gobierno a publica na april e aña aki.

 

Gobierno su meta ta pa crea un economia sostenibel y resiliente pa drecha Aruba su infrastructura fisico y digital, stimula negoshinan nobo y inovativo, crea trabounan inclusivo y alabes stimula inversionnan local y atrae inversion di exterior. Tur esakinan pa por contribui na un miho calidad di bida di tur cuidadano na Pais Aruba.  Aruba su economia ta construi riba 4 pilar, cualnan ta desaroyo di nos empresarionan, promove inversion pa diversifica economia di Aruba, stimula cooperacion internacional pa comercio y exportacion di producto y servicionan di Aruba y empoderamento di e consumidor. Minister Ruiz-Maduro a elabora riba e parti esencial di cada un pilar cu ta contribui na un economia resiliente. Tambe e mandatario a informa cu Gobierno ta trahando pa mehora e facilidad pa haci negoshi y reduci e gasto di haci negoshi y tambe ta trahando riba un maneho di inversion pa Aruba. 

 

Alabes e mandatario a subraya cu e Seis Sectornan Prometedor, Turismo, Economia di Conocemento, Agricultura, Logistica, Economia Circular y Industria Creativo lo contribui directamente pa fomenta un economia resiliente. E Seis Sectornan Prometedor lo fortalece e exportacion di producto y/of servicio, mehora e productividad, crea oportunidadnan nobo y tambe ta un medio pa mantene e stabilidad monetario. E dignatario ta contento cu e recomendacionnan di e publicacion di CBA ta sostene e Seis Sectornan Prometedor.  Minister Ruiz-Maduro a sigui bisa cu esaki ta un bon oportunidad pa companianan di Aruba por desaroya nan habilidad y capacidad pa produci pa asina por exporta nan producto y/of servicio. Ya caba tin algun compania na Aruba cu ta exporta nan producto manera productonan di Aloe Vera y tambe muebles di oficina. Nos comerciantenan mester sigui construi riba e parti aki y asina fortalece nos economia resiliente.

 

Otro aspecto cu ta masha importante pa construi un mercado fuerte y tin un economia resiliente ta nos ciudadonanan cu ta consumidornan critico cu ta birando mas consiente di gasto y regularmente ta compara producto riba calidad y prijs. E transparencia di prijs hunto cu consumidornan critico ta aspectonan cu ta hopi importante pa keda competitivo. Na momento cu ta promove transparencia y integridad, e autoridadnan publico tin un rol importante den proteccion di e derechonan di consumidor. Actualmente Gobierno ta den proceso pa adapta/modernisa e leynan existente. Na final di e simposio Minister Ruiz-Maduro a forma parti di un panel pa contesta pregunta.

 

E mandatario a bisa cu Gobierno tin retonan, pero tin cambionan tambe cu ta mas grandi cu e retonan. ‘Hunto nos por atende cu e retonan structural den nos economia y mercado laboral, aumenta e productividad laboral competitivo y sostenibel di Aruba su economia.  Manera e Presidente di CBA sra. Semeleer a trece dilanti: ora algo pasa bo como Pais, e no ta bay solamente a con ta yega bek na e situacion prome cu e sosedido pero tambe con ta ‘bounce’ bay dilanti. Mi ta fuertemente convenci cu eventonan manera e simposio aki ta reinforsa nos esfuerso pa avansa conhuntamente’. Pesey mi ta gradici CBA pa nan colaboracion pa organisa un simposio y elabora riba e tema di un economia resiliente,  Minister Ruiz-Maduro a termina bisando.

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: