Komportashon di e organisashon SEFBA pa ku sentronan di bario
Na: Minister di Desaroyo Sosial, Labor i Bienestar,
Señor Hensley Koeiman
PRESENTE
Tópiko: Komportashon di e organisashon SEFBA pa ku sentronan di bario
Kòrsou, 9 di sèptèmber 2019
Honorabel señor Koeiman,
Ta ampliamente konosí ku ya pa algun aña sentronan di bario ta konfrontando bastante problema a konsekuensia di e “maneho” ku ta keda hibá pa e fundashon di gobiernu, esta Fundashon pa Stimulá Edukashon i Formashon den Bario (SEFBA).
Ta sirkulá tambe informashonnan ku den pasado resien, por lo ménos un (1) sentro di bario na mas ku un okashon hasta a kuminsá un kaso den korte kontra SEFBA pa asina obligá SEFBA koregí desishonnan robes ku SEFBA a tuma i ku a perhudiká e sentro di bario en kuestion.
Igualmente nos frakshon ta disponé di informashonnan ku UNSEBAKO, den representashon di 18 di e 23 sentronan di bario, na mas ku un (1) okashon a aserká señor minister por eskrito pa haña klaridat i/òf solushon pa problemanan ku sentronan di bario afiliá na UNSEBAKO ta konfrontá pa motibu di e maneho ku SEFBA ta hiba, te ku awe UNSEBAKO no a risibí ningun kontesta satisfaktorio di parti di señor minister.
Pa por komprondé embergadura di e problemanan ku sentronan di bario ta konfrontando i tambe pa e sentronan di bario por sa pa ki tempu por spera solushon pa nan problemanan, hasiendo uso di artíkulo 96 di Reglamentu di Orden di Parlamento mi ta hasi Minister Koeiman e siguiente preguntanan;
- Minister por informá Parlamento si entretantu a logra solushon pa e problemanan di sentronan di bario, manera nan a keda formulá pa UNSEBAKO den e dokumento fechá 27 di òktober 2014 i presentá na minister di Desaroyo Sosial, Labor i Bienestar riba mes un fecha durante reunion entre gobièrnu di Kòrsou i direktivanan di sentronan di bario di Kòrsou na sentro di bario Ser’i Papaya?
- Si e kontesta di pregunta 1, ta afirmativo for di kua fecha e problemanan a keda solushoná?
- Si e kontesta ta negativo, Minister por informá Parlamento pa kua fecha òf pa kua temporada sentronan di bario por spera solushon pa nan problemanan?
- Minister por konfirmá pa Parlamento ku tin un kantidat di sentro di bario ku tin un akuerdo di koperashon firmá ku SEFBA?
- Señor minister por konfirmá tambe si partidonan ta kumpliendo ku e akuerdo di koperashon i si esei no ta e kaso, pa ki motibu nò i kon Minister ta pensa na move partidonan pa kumpli ku otro, unabes ku ta fondonan públiko ta envolví?
- Señor minister por informá Parlamento si den kuadro di inklushon ta na su lugá pa enkargá/envolví UNSEBAKO ku maneho/supervishon di aktividatnan di SEFBA, unabes ku UNSEBAKO ta representá gran mayoria di sentronan di bario di Kòrsou?
- Por último, Minister por informá Parlamento kua ta e maneho di gobièrnu/Minister pa loke ta sentronan di bario (spesialmente pa loke ta nan tarea i nan envolvimentu pa loke ta funshonamentu di bario komo tal)?
Atentamente,
Gilbert Doran
Parlamentario pa
Frakshon di MFK
Willemstad, 9 di sèptèmber 2019
Na: Presidente di Parlamento di Kòrsou
Señor W. Millerson
Wilhelminaplein # 4
PRESENTE
Señor Presidente,
Pa medio di e karta aki, hasiendo uso di artíkulo 96 di reglamentu di órden
di Parlamento, mi ke pidi bo persona pa dirigí e karta athunto na Minister Hensley Koeiman enkargá ku Desaroyo Sosial, Labor i Bienestar, ku preguntanan ku mi persona ta hasi na e minister konserní.
Danki pa e koperashon.
Atentamente,
___________________
Gilbert Doran


