Parlamentario Curtley Obispo: Kiko ta un Enkuesta Parlamentario?

Kiko ta un Enkuesta Parlamentario?

A base di: (1) nos Areglo di Estado di Kòrsou (nos lei máksimo), (2) e Lei di Enkuesta i (3) Reglamento di Orden di Parlamento di Kòrsou, parlamentario Curtley Obispo ta splika kiko ta un Enkuesta Parlamentario. Artíkulo 59 di Areglo di Estado di Kòrsou ta indiká ku: Parlamento di Kòrsou tin e derecho di enkuesta mediante ordenansa nashonal (lei). Un Enkuesta Parlamentario ta un di e métodonan di kontrol ku Parlamento di Kòrsou tin na su disposishon a base di nos Areglo di Estado di Kòrsou. E ta un método mas pisa ku e derecho di interpelashon. Derecho di interpelashon (kuestioná) ta e método di kontrol ku Parlamento di Kòrsou tin banda di e derechi di hasi pregunta (“vragenrecht”) na un Minister di Gobièrnu di Kòrsou. Ku e derecho di interpelashon, Parlamento di Kòrsou, por pidi un Minister di Gobièrnu di Kòrsou responsabilisá su mes pa e maneho ku e ta hiba. Un Enkuesta Parlamentario ta wòrdu usa ora interpelashon no ta duna sufisiente klaridat riba un tema ku ta wòrdu investigá dor di Parlamento di Kòrsou. 

Segun parlamentario Curtley Obispo, e derecho di enkuesta ta duna Parlamento di Kòrsou e posibilidat pa buska mas informashon serka personanan i asina haña mas informashon. Parlamento di Kòrsou tin e derechi pa investigá un tópiko spesífiko na un manera mas profundo.  Parlamento di Kòrsou por embolbí tambe kualke instansia òf personanan partikular (pafó di Gobièrnu di Kòrsou) den e investigashon profundo aki. Esaki nos ta yama derechi di enkuesta, kual mester tuma lugá teniendo kuenta ku loke ta stipulá den e Lei di Enkuesta i Reglamento di Orden di Parlamento di Kòrsou.

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: