MINISTER RUIZ-MADURO A HACI APERTURA DI E CURSO DI CALKI
MINISTER RUIZ-MADURO A HACI APERTURA DI E CURSO DI CALKI
Oranjestad – Dialuna atardi Minister Ruiz-Maduro a haci apertura di e curso di kalki. E curso aki a
organisa pa Monumentenfonds hunto cu e compania Parvenir Heritage Restoration & Maintenance Company Ltd di Trinidad & Tobago den cooperacion cu Departamento di Enseñansa pa Empleo, Museo Arkeologico y Stichting Rancho. E mandatario a yama bon bini na e expertonan di Parvenir Heritage Restoration & Maintenance Company Ltd di Trinidad & Tobago y a gradici nan pa bin comparti nan conocemento cu nos.
E meta di e curso ta pa brinda educacion riba e ofishi di traha cu calki pa asina e habilidad aki keda conserva y por wordo pasa pa mas generacion. Hopi monumento na nos Pais ta traha di calki y pesey pa por restaura y renoba nan, nos hendenan mester tin e conocemento y e habilidad pa traha cu calki.
Pa e mandatario tabata un placer di mira un sala yen di persona y instancia cu a mustra interes den e curso. Esaki ta brinda e speransa cu mas hende ta conciente cu ta importante pa nos educa nos mes riba e balor historico di nos monumentonan y sitionan di interes y cu nos mester percura pa restaura nan debidamente pa asina nan por keda conserva como nos herencia cultural.
Minister Ruiz-Maduro a desea e organisadornan hopi exito cu e curso di calki y na tur participante un siman fructifero y cu na final nan tur lo ta hopi satisfecho di tur locual nan por a siña y experiencia hunto.
