SENTRO KULTURAL KORSOU TA ORGANISA UN EKSPOSISHON DI KA’I ORGEL MINIATURA TRAHA DO DI KLIENTENAN DI SDKK.

SENTRO KULTURAL KORSOU TA ORGANISA UN EKSPOSISHON DI KA’I ORGEL MINIATURA TRAHA DO DI KLIENTENAN DI SDKK.

 

Den kuadro di selebrashon di “Aña di Ka’I Orgel”, Sentro Kultural Kòrsou (CCC) huntu ku Sentro di Detenshon i Korekshon Kòrsou (SDKK) a organisá un proyekto di traha Ka’i Orgel Miniatura for di material desechabel dor di klientenan di SDKK. 

 

Pa por a realisá e proyekto aki, e klientenan partisipante a partisipá na un tayér, den kua nan a risibí informashon di historia i detaye kon un Ka’I Orgel ta hinká den otro.  Ku e informashonnan aki, usando nan kreatividat nan lo mester a produsí Ka’I Orgel Miniatura ku nan propio inspirashon. Mester bisa ku e klientenan di SDKK tabatá hopi entusismá pa partisipá na e proyekto aki, I tantu Gerensia komo personal di SDKK a duna tur nan koperashon.

 

E proyekto di Ka’i Orgel Miniatura ta un kompetensia, di kua e 3 Ka’i Orgel Miniatura ku mas a destaká i esun ku number mas original lo risibi un premio. Un hurado lo huzga e obranan i e premiashon lo sigui den e promé siman di òktober próksimo.

 

En konekshon ku esaki, durante e periodo di 27 pa 29 di sèptèmber lo tene un eksposishon di tur e Ka’i Orgel Miniatura ku a keda produsí den Ouditorio di Sentro Kultural Kòrosu situa na Koniginnelaan den Emmastad. E eksposishon lo ta habrí pa públiko di 9’or di mainta pa 4’or di atardi. Entrada ta kompletamente gratis.

 

Sentro Kultural Kòrsou kier a gradisí tantu gerensia i personal di SDKK, komo tambe Fundashon Kas di Kultura I Fundashon Museo di Kai Orgel pa nan aporte i nan balioso koperashon den e proyekto aki. Por ultimo i mas importante un danki na tur e klientenan ku a partisipá den e proyekto di Ka’i Orgel Miniatura.

 

Sentro Kultural Kòrsou pa medio di esaki ke invitá henter komunidat pa nan pasa atmirá e obranan ku klientenan di nos Sentro di Detenshon i Korekshon a traha.