Petishon di Frakshon di PAR pa un reunion di Komishon Sentral ku Minister di Finansa ku tópiko: Plannan di Minister di Finansa pa ku edifisionan temporal, edifisio nobo i un organisashon nobo di Servisio di Belasting di Pais Kòrsou.

September 26, 2019 REDAKSHON

Presidente di Parlamento di Kòrsou

Señor William W. Millerson

Wilhelminaplein # 4

Presente

Djaweps, 25 sèptèmber 2019

Petishon pa un reunion di Komishon Sentral ku Minister di Finansa ku tópiko: Plannan di Minister di Finansa pa ku edifisionan temporal, edifisio nobo i un organisashon nobo di Servisio di Belasting di Pais Kòrsou.

Apresiabel señor Presidente Millerson,

E kandela den mardugá 22 ougùstùs 2019 na edifisio di Ontvanger i Inspekshon di Belasting di Kòrsou a kousa daño i a paralisá temporalmente e servisio di e 2 servisionan di Gobièrnu di Kòrsou na Pueblo di Kòrsou. Den kuadro di e suseso aki ta importante pa Parlamento di Kòrsou deliberá ku Minister di Finansa señor Kenneth Gijsbertha riba entre otro e siguiente puntonan:

e efektonan pa loke ta organisashon di personal, servisio na Pueblo di Kòrsou i tambe e kontribushon di belasting di kontribuyentenan na kaha i Kuenta Koriente 2019 di Pais Kòrsou;
e konsekuensianan pa gastunan kolektivo den ehekushon di Presupuestonan 2019 i 2020 di Pais Kòrsou;
e solushonnan temporal ku a implementá pa asina garantisá e servisio na Pueblo di Kòrsou i tambe pago di kontribushon di belasting dor kontribuyentenan;
e solushonnan struktural ku lo mester implementá garantisá e servisio na Pueblo di Kòrsou i tambe pago di kontribushon di belasting dor kontribuyentenan;
e plannan pa temporalmente ubika personal di Ontvanger i tambe Inspekshon di Belasting di Kòrsou;
e plannan konkreto di Minister di Finansa pa konstruí un edifisio nobo;
e plannan konkreto di Minister di Finansa pa un organisashon nobo di Servisio di Impuesto di Pais Kòrsou kual ta konsistí di Ontvanger i Inspekshon di Belasting di Kòrsou.

P’esei ta importante pa Parlamento di Kòrsou deliberá ku Minister di Finansa, señor Kenneth Gijsbertha, tokante e tópiko i entre otro e puntonan ariba menshoná.

Pa medio di e karta aki firmantenan ta hasi un petishon na señor Presidente Millerson pa konvoká konforme artíkulo 33 di Reglamento di Orden di Parlamento di Kòrsou, un reunion di Komishon Sentral ku Minister di Finansa señor Kenneth Gijsbertha ku tópiko: Plannan di Minister di Finansa pa ku edifisionan temporal, edifisio nobo i un organisashon nobo di Servisio di Belasting di Pais Kòrsou.

Firmantenan di Frakshon di PAR ta konta ku Presidente ta honra nos petishon den un di e próksimo simannan di reunion di e aña 2019 pa konvoká e reunion aki di Komishon Sentral ku Minister di Finansa.

Atentamente,

Curtley Obispo Ana Maria Pauletta Stephen Walroud