Willemstad – Minister di Tráfiko, Transporte i Planifikashon Urbano sra. Zita Jesus Leito i Servisio pa Obra Públiko (OW) ta informá ku djaluna 30 sèptèmber 2019 ta kuminsá ku trabounan infrastruktural riba Kaya Wana, ku ta un kaminda paralèl di Jan Noorduynweg.

Primeramente lo drecha i amplia e duiker ku ta pasa bou di e kaya aki, miéntras ku lo traha un labadó riba e duiker. E kaminda mes ku ta Kaya Wana ta di tal forma kaba ku lo mester yena e burakunan i hala un kapa di asfalt.

Servisio pa Obra Públiko ta informá tambe ku unabes ta trahando riba  Kaya Wana  lo probechá drecha e duiker riba Jan Noordyunweg. E trabounan aki ta kuminsá djaluna 30 sèptèmber 2019 i lo tin un durashon di un siman. MNO Vervat ta e kontratista enkargá ku e trabounan.

Na momento ku e trabounan ta tumando lugá riba Kaya Wana e kaminda ta aksesibel pa abitantenan miéntras ku otro personanan lo mester sigui bòrchinan di indikashon.

Minister Jesus Leito i Servisio pa Obra Públiko ta pidi outomobilistanan pa tene kuenta ku esaki i kore ku koutela. Alabes ta pidi diskulpa pa kualke  inkumbiniensia i ta gradisí pa e komprenshon.