Na Merka: Kòrsou a entregá un petishon mas pa un eksonerashon nobo riba sanshonnan

WILLEMSTAD – Djaluna benidero 30 di sèptèmber, Promé Minister di Kòrsou Eugene Rhuggenaath ta di bishita na Washington D.C. pa papia ku entre otro e Office of Foreign Assets Control (OFAC) tokante un eksonerashon adishonal riba e sanshonnan ku Merka a imponé riba PDVSA. Durante e reunion el lo elaborá riba e petishon ku a keda entregá djaweps 26 di sèptèmber na OFAC. Promé Minister lo reuní ku State Department i ku Treasury Department tambe.

Na luna di mei último, Kòrsou ya kaba a risibí un eksonerashon di Merka pa yuda suavisá e konsekuenshanan pa Kòrsou di e sanshonnan ku Merka a pone riba algun persona i kompania di Venezuela. Ni maske ku Kòrsou riba su mes no tin nada di haber ku e kousa di e situashon na Venezuela, komunidat di Kòrsou ta sinti efekto negativo di esaki. PDVSA i alabes Refineria Isla, no por a sigui ku su operashon normal. Banda di e sanshonnan di Merka, Refineria Isla ta keda afektá tambe dor di un sentensia di hues na Merka ku ta pone ku por ehèmpel ConocoPhillips por konfiská zeta riba barkunan ku mester yega nos refineria, mirando e debenan ku PDVSA tin ku paga kompanianan, den e kaso aki entre otro ConocoPhillips. Refineria Isla aktualmente no ta kumpliendo tampoko ku tur su obligashonnan finansiero na instansha i kompanianan lokal ku a hasi trabou p’e.

E eksonerashon (‘special license’) aktual di mei último no ta sufisiente pa yuda atendé ku e riesgo ku a surgi despues, esta ku Refineria Isla na un dado momentu lo no por kumpli ku pago di salario, seguro, pago di utilidat, mantenshon i hür, ku chèns di mester sera promé ku 31 di desèmber 2019. E impakto di esaki pa Kòrsou, esta komunidat, lo ta grandi, i lo nifiká hopi gastu. Benifisiarionan lokal ku hopi probabilidat lo no por (sigui) risibí nan pagonan i hende por sigui pèrdè trabou.

Teniendo bon kuenta ku e posibel senario aki, i tambe e echo ku e sanshonnan entretantu a sigui eskalá, Gobièrnu di Kòrsou ta tumando akshon pa medio di su kompanianan manera Refineria di Kòrsou (RdK) i Curoil pa purba salbaguardiá e pagonan na instanshanan lokal. Durante di su estadia na Washington D.C., Promé Minister lo hasi tur loke ta den su alkanse pa trese un solushon duradero ku ta benefisiá Kòrsou. Durante su reunionnan e ta risibí sosten kompleto di entre otro embahador di Reino na Washington D.C. Sinembargo, e desishon pa duna eksonerashon ta den man di Merka.

Gobièrnu di Kòrsou, no opstante e reto su dilanti, ta posishoná su mes di forma optimista pa ku e reunionann ku ta bai tuma lugá i ta spera riba un resultado positivo. Gobièrnu pa medio di su kanalnan di komunikashon ofisial i sr. Doran komo bosero, lo sigui informá komunidat di e desaroyonan.