Prome Minister Evelyn Wever-Croes: Reunionnan di Prome Minister durante e di 74 Reunion General di Nacionnan Uni: UN SIMAN INTENSIVO PERO HOPI FRUCTIFERO CU BON PALABRACIONNAN HACI PA PAIS ARUBA
Prome Minister Evelyn Wever-Croes:
Reunionnan di Prome Minister durante e di 74 Reunion General di Nacionnan Uni:
UN SIMAN INTENSIVO PERO HOPI FRUCTIFERO CU BON PALABRACIONNAN HACI PA PAIS ARUBA
Durante e siman di 23 pa 27 di september, a tuma luga na New York e di 74 Reunion General di Nacionnan Uni (‘General Assembly’). Como parti di Reino Hulandes, Aruba ta forma parti di Nacionnan Uni y a base di esaki ta atende reunionnan aki.
Den e siman cu a pasa, Prome Minister Evelyn Wever-Croes a atende varios reunion riba e tema di Sustainable Development Goals SDG’s, Metanan di Desaroyo Sostenibel. Ta trata di e 17 metanan cu Nacionnan Uni a stipula pa crea un miho mundo pa 2030 cuanan Aruba tambe ta compremeti pa cumpli cu nan. Metanan manera Combati Pobresa y Hamber, Bon Educacion, Awa di calidad pa tur hende, Posicion di Hende Muhe y Oportunidad pa Hende Muhe.
E dos ultimo puntonan Prome Minister a indica cu tawata esunnan di mas importante y a elabora mas hopi riba nan den varios reunion na unda cu a yega na palabracionnan hopi interesante. Nacionnan Uni por yuda Aruba desaroya maneho riba e tereno aki.
E tema di corupcion y bon gobernacion tambe tawata temanan importante di discucion den e reunionnan na Nacionnan Uni incluyendo digitalisacion y e-Government. Banda di varios reunionnan di Nacionnan Uni, Prome Minister a reuni cu World Economic Forum (WEF) y cu e organisacion OECD na unda tambe a toca e temanan menciona y a haci palabracionnan hopi interesante.
Prome Minister, probechando tambe cu presente na e Asemblea General di Nacionnan Uni tawata tin varios lider di diferente pais den region, a tuma e oportunidad pa reuni cu varios pa trata e tema di Venezuela. Prome Minister a reuni cu e Embahado di Reino na Washington na unda Prome Minister a ricibi un ‘update’ amplio riba e ultimo desaroyonan.
Tambe e mandatario prinicipal di nos pais a atende un reunion riba tereno ministerial di Caribe cu Under Secretary of State David Hale. Un reunion hopi importante cu a wordo trata tambe den cuadro di Reino.
Finalmente, un otro reunion di Reino cu a wordo atendi ta un reunion entre Su Mahestad Willem Alexander y Reina Maxima hunto cu e Prome Ministernan di e 4 paisnan di Reino Hulandes na unda a trata e relacion di Reino en general y e cooperacion entre e paisnan den Reino.
“Di parti di Aruba, mi a trece padilanti cu loke mi mester ta espacio y tempo pa nos cumpli cu e palabracionnan cu nos a haci pa asina nos saca Aruba for di e problemanan financiero. Mi a enfatisa cu Aruba ta bayendo den e bon direccion cu un economia creciente, turismo ta creciendo y desempleo ta bahando. Y pa loke ta trata e situacion financiero di nos pais, mi a indica na nan cu Gobierno actual a bin di deficitnan di 300 pa 400 miyon florin durante e Gobierno anterior. E Gobierno actual a baha esaki te cu 25 miyon florin e aña aki”, Prome Minister a duna di conoce.
Awo Gobierno ta trahando riba e prome presupuesto balansa pa Aruba despues di hopi tempo. E presupuesto balansa ta pa 2020 caba. E punto aki tawata necesario y importante pa trece padilanti den e reunion pasobra e mal maneho financiero door di e gobierno anterior a cuasa hopi desconfiansa den Aruba di parti di Hulanda. Awe Aruba ainda tin di lucha cu e desconfiansa aki y bringa contra e desconfiansa cu a wordo crea door di e gobierno anterior y pone orden den e situacion financiero di pais Aruba.
“Mi ta mira atras riba un siman hopi intensivo y na mes momento hopi fructifero cu bon palabracionnan haci pa pais Aruba”, Prome Minister Evelyn Wever-Croes a duna di conoce.
Riba e potret: Secretario General di Nacionnan Uni, Rey Willem Alexander, Reina Maxima, 4 Premier di Reino, PM Evelyn Wever-Croes di Aruba, PM Leona Marlin Romeo di Sint Maarten, PM Eugene Rhuggenaath di Corsou y PM Mark Rutte di Hulanda. Tame riba e potret, Minister Blok di Hulanda y Minister Kaag di Hulanda.
