“ Silver Entrepreneurship Part II” – for the retired or soon to be retired tawata un biaha mas bon atendi

“ Silver Entrepreneurship Part II” – for the retired or soon to be retired

tawata un biaha mas bon atendi

 

ORANJESTAD – Dialuna, dia 23 september 2019, Departamento di Asuntonan Economico, Comercio y Industria mediante su unit di Iniciativa pa Desaroyo pa Empresa Arubano (IDEA) a organisa un mitar dia di workshop “Silver Entrepreneurship Part II”, pa tur (pre-) pensionado cu ta desea di uza nan carera y experiencia di bida den nan mesun negoshi. Despues di un exitoso workshop di “Silver Entrepreneurship” cu IDEA a organisa den luna di juni ultimo, a dicidi di organisa un di dos parti cu otro tipo di topiconan comercial pa e mesun grupo.

 

E siguiente oradornan a sa di presenta profesionalmente cu e siguiente topiconan informativo y interesante: 

 

  • Sr. Oliver Vieira, Commercial Lending Advisor na Qredits Aruba, a presenta tur loke un persona mester tene na cuenta cune ora pa aplica pa un prestamo pa cuminsa un negoshi chikito of mediano y tambe despues di haya un prestamo. Sr. Vieira a presenta tur su servicio nan cu nan ta ofrece y tambe informacion nan importante pa tene cuenta cune ora di traha un Business Plan y tambe di nan sistema di coaching cu nan ta ofrece na nan clientenan.
  • Sr. Andres Dirks, Hoofd Bureau Arbeidsgeschillen (Conflicto y Retiro) na Departamento di Labor y Investigacion (DAO); a presenta tur e servicio nan cu nan ta ofrece na e dunador di trabou, ki tur e inspeccion di trabou ta encera, e 3 forma di convenio ora di hasi un trabou, e caracteristicanan di un convenio di trabou, contenidonan di un convenio di trabou, duracion di un convenio di trabou, convenio di trabou pa un periodo stipula y tambe tur e derechonan y debernan di un dunador di trabou. 
  • Sra. Indira Burke, Managing Director na Loui Henri Media Services, a presenta e objectivo di mercadeo, pakiko ta importante pa hasi mercadeo, con pa logra conkista e mercado local, con pa usa “Google My Business”, con pa conkista e mercado global y tambe sra. Burke a presenta e stap nan pa traha un ‘Facebook Ad Manager’ y tambe ki tur ‘Facebook Blueprint’ por ofrece nan.

 

Un total di 25 persona a participa den e workshop aki. Idea ta sumamente contento cu e contenido y acogida di e workshop y tambe di e bon comentarionan ricibi di su participantenan. Un workshop sigur hopi interactivo cu hopi pregunta di parti di e participantenan y un tremendo presentacion di parti di tur e 3 oradornan.

 

Tambe IDEA  kier remarka cu nan workshopnan ta gratis y ta dedica na un y tur cu kier cuminsa un negoshi of tin un negoshi existente y kier educa nan mes riba diferente topico comercial.  

Un danki na tur e participantenan y un danki special na tur e presentadornan di Qredits Aruba, Departamento di Labor y Investigacion y Loui Henri Meida Services, cu a comparti nan experticio cu tur esnan presente. IDEA ta gradici tur e coleganan di DEZHI cu a juda na un of otro manera. Keda pendiente pa mas workshop den aña 2020 cu lo wordo organisa door di IDEA y tambe nos curso “Empresario Prepara I” cu lo cuminsa den luna di april 2020. 

Por sigui nos riba Facebook page @Idea-Aruba pa mas workshop y otro actividadnan di IDEA den futuro.

 

This site uses Akismet to reduce spam. Learn how your comment data is processed.

%d bloggers like this: