Kòrsou ta klousurá partisipashon éksitoso na Nashonnan Uní moderando e foro di islanan mundial

Kòrsou ta klousurá partisipashon éksitoso na Nashonnan Uní moderando e foro di islanan mundial

Geplaatst op 1 Òktober 2019 dor di Ministerio di Asuntunan General i Promé Minister

WILLEMSTAD — Promé Minister Rhuggenaath ta wak bèk riba un bishita intensivo i éksitoso na Nashonnan Uní kargá ku reunionnan bilateral i partisipashon na foronan riba nivel haltu ku enfoke riba e temanan: desaroyo di islanan chikí, finansiamentu i kolaborashon i tambe e metanan mundial pa desaroyo sostenibel, konosí komo SDGs.

Djabièrnè tabata un di e dianan mas importante kaminda atardi Promé Minister a moderá e revishon ‘high level’  di SAMOA Pathway, kual ta e kuadro internashonal ku ta preskribí temanan spesífiko ku ta importante pa islanan chikí den desaroyo (SIDS) manera Kòrsou. Konforme e kuadro aki, paisnan i institutonan internashonal ta forma kolaborashon i tambe buska finansiamentu. Kòrsou ta kanando dilanti riba e tema di energia i tambe konservashon di oséano, pero alabes a profilá oportunidatnan pa nos por risibí mas sostén. Den e seshon di revishon, Promé Minister a moderá e panel ku partisipashon di Presidente di Kenya, Promé Minister di Jamaica, e Atministradó (direktor) Global di UNDP i representante di Bloomberg Philantropies.

Tambe djabièrnè mèrdia Promé Minister Rhuggenaath a topa ku miembronan di Global Island Partnership (GLISPA) i a anunsiá ku Kòrsou lo djòin e UN Local 2030 Islands Network. Esei ke men ku den futuro nos lo kompartí e inisiativanan den kuadro di e agènda mundial 2030 di desaroyo i kolaborá mas ku otro islanan riba inisiativa i solushonnan komun. Esaki ta habri porta pa profilá nos avansenan i risibí mas sosten.

Promé Minister Rhuggenaath ademas a hiba palabra na un enkuentro ‘high level’ di International Renewable Energy Agency (IRENA) riba djabièrnè pa papia riba nos maneho di energia renobabel, metanan stipulá i posibilidatnan pa kolaborashon ku Kòrsou. Djaweps mainta el a papia na un enkuentro ‘high-level’ di IOM riba impakto di migrashon i formanan kon islanan chikí mester dil ku esaki ku rekursonan limitá. Promé Minister Rhuggenaath tambe tabata presente i a duna un presentashon na un lunch privá di Sekretario di Komersio di Merka Sr. Wilbur Ross i na un meeting ku lidernan di Karibe huntu ku Sekretario suplente di Estado di Merka, Sr. David Hale, pa papia riba e strategia ‘US-Caribbean 2020’ i ‘US-Caribbean Resilience-partnership’, den kua Merka ta buta sosten disponibel pa paisnan den Karibe.

Tabatin akuerdo ku mester keda reforsá kolaborashon i kompartí ku otro eksperiensianan pa loke ta trata e tópiko di krea komunidatnan ku ta mas resistente pa efektonan, sea ta natural òf finansiero-ekonómiko den region Karibense. Un enkuentro ekstraordinario tabata un enkuentro privá ku presidente Bill Clinton, promé ministernan di otro pais den Karibe i tambe lidernan di Banko Mundial, Banko di Desaroyo Inter-Amerikano i kompanianan privá i filantrópiko.

Pa promé Minister Rhuggenaath tabata importante durante e eventonan aki pa no solamente enfoká riba e retonan i limitashon di islanan, pero tambe riba e oportunidatnan; “Islanan por ta un modelo, un ‘living lab’, pa solushonnan ku por yuda paisnan mas grandi i tin hopi posibilidat pa invertí i kolaborá di forma ‘win-win’ ku islanan den desaroyo.”

E biahe pa asamblea general di Nashonnan Uní tabata unu éksitoso kaminda Kòrsou a haña oportunidat pa profilá su mes (despues di nos ousensia aña pasá) riba tarima internashonal, reforsá relashonnan den Reino, reforsá relashonnan ku nos pais bisiñanan den region Karibense i otro islanan rònt mundu i tambe ku persona-, instansia- i organisashonnan internashonal ku por nifiká hopi pa Kòrsou. Despues di e biahe lo mantené relashon i ‘follow up’ riba e puntonan di akshon.

Promé Minister Rhuggenaath na apertura di e di 74 Asmblea General di Nashonnan Uní.

Durante e enkuentro (lunch) ku èks presidente di Merka Bill Clinton (Clinton Foundation).

Reunion ku miembronan di Global Island Partnership (GLISPA).


Promé Minister Rhuggenaath na ‘Multidimensional Poverty side event’

This site uses Akismet to reduce spam. Learn how your comment data is processed.

%d bloggers like this: