Karnaval 2020 ta keda organisá pa Fundashon JAG
Karnaval 2020 ta keda organisá pa Fundashon JAG
Geplaatst op 2 Òktober 2019 dor di Ministerio di Enseñansa, Siensia, Kultura & Deporte
Fundashon JAG ku enkargo di organisashon 50 edishon di e fiesta karnavalesko. Djamars 1 di òktober Minister di Enseñansa, Siensia, Kultura i Deporte sra. Marilyn Alcalá-Wallé a otorgá representantenan di Fundashon JAG e pèrmit ofisial pa organisá e di 50 edishon di e fiesta di Karnaval 2020.
Fundashon JAG a demonstrá di ta disponé di e kalidatnan profeshonal i étiko ku un fundashon mester disponé di dje ora ta ehekutá un trabou na nòmber di gobièrnu. Ademas e fundashon a hasi entregá di e dokumentonan nesesario pa dina un bista di e aktividatnan.
Pa konsolidá Karnaval 50, Minister Alcalá-Wallé a tuma e desishon pa lanta alabes un “Plataforma 50 edishon Karnaval Kòrsou” ku ta konsistí di e siguiente entidatnan inkluyendo Grupo JAG: Asisashon di Gruponan di Karnaval Kòrsou (AGKK), Asosiashon di Músika i Artista Kòrsou (AMAK), Curaçao Carnival Goes Global (CCGG), Curaçao Tourist Board (CTB) i FUNDASHON Karnaval Banda’Bou (FKBB).
Minister ta deseá tur partner den karnaval un bon preparashon pa e di 50 edishon di Karnaval.
Riba e potret: Juni I Glenda Aniceta huntu ku Minister Alcalá-Wallé risibiendo e dokumentonan konfirmashon.