Prome Minister Evelyn Wever-Croes: Durante reunionnan na Nacionnan Uni na New York: PROME MINISTER A ATENDE REUNIONNAN RIBA DIFERENTE NIVEL RIBA E TEMA DI VENEZUELA

Prome Minister Evelyn Wever-Croes:

 

Durante reunionnan na Nacionnan Uni na New York:

PROME MINISTER A ATENDE REUNIONNAN RIBA DIFERENTE NIVEL RIBA E TEMA DI VENEZUELA

 

Durante e reunionnan na Nacionnan Uni na New York siman pasa, Prome Minister Evelyn Wever-Croes a atende tambe riba diferente nivel cu e tema di e crisis di Venezuela y e impacto cu esaki tin na Aruba. 

 

Entre e reunionnan cu a tuma luga riba e tema aki, tawata un reunion ministerial di paisnan den Caribe hunto cu Under Secretary of State señor David Hale. E puntonan principal cu a wordo comparti den e reunion tawata e vulnerabilidad cu ta existi door di e situacion actual di nos pais bisiña Venezuela y tambe e preocupacionnan di Gobierno Mericano tocante e situacion aki. A enfatisa e importancia pa tene cuenta cu paisnan chikito manera Aruba cu ta hopi cerca di Venezuela, lo wordo impacta door di cualkier decision cu Merca tuma.  

 

Tambe Prome Minister a reuni cu Embahada di Reino na Washington señor André Haspels for di ken Prome Minister a ricibi un update di informacionnan riba e desaroyonan di Venezuela cu ta yuda Aruba tin un miho bista riba loke ta socociendo na Venezuela. E situacion na Venezuela ta hopi critico y cu e sancionnan nobo cu a wordo poni y cu lo wordo poni ainda, e situacion lo bira mas tenso. 

 

Un otro reunion riba e tema di Venezuela, tawata cu ex Presidente di Merca señor Bill Clinton di Clinton Foundation. A discuti riba e riesgonan cu e crisis di Venezuela por tin den nos region, specialmente riba economia di nos pais. Gobierno di Aruba ta keda busca formanan conhunto pa fortifica economia di paisnan chikito den region pa ta mas prepara pa cualkier eventualidad.

 

Durante e reunion cu Minister di Relacionnan Exterior di Reino Stef Blok hunto cu Prome Minister di Corsou Eugene Rhuggenaath y Prome Minister di Sint Maarten Leona Marlin-Romeo, tambe a elabora riba e riesgonan cu tin den nos region pa cu e situacion dificil na Venezuela. Riba e tema di frontera, a palabra cu frontera ta keda cera por lo pronto. E tema di Visa pa esnan di Venezuela tambe a ser menciona. Di parti di Aruba, tawata insistente den e peticion na Reino pa introduci Visa pa Venezolanonan pa motibo cu esaki lo duna proteccion na nos pais di esnan cu ta bin aki y haci cosnan illegal na nos pais. Riba esaki, tin consensus den Reino y awo ta trahando riba e implementacion di Visa pa Venezolanonan. Dentro di poco esaki lo keda cla. 

 

“Aruba na e momentonan aki ta convivi cu nos pais bisiña Venezuela, pero aworaki nos mester tene cuenta cu Aruba prome, pasobra si nos no haci’e, niun hende ta haci’e pa nos”, Prome Minister Evelyn Wever-Croes a expresa.

 

This site uses Akismet to reduce spam. Learn how your comment data is processed.

%d bloggers like this: