Tópiko:  Papia kla ku e pueblo di Kòrsou i empleadonan di refineria Isla riba e tema di futuro di nos Refineria.

Na Minister Presidente

Señor Eugene Rhuggenaath

PRESENTE

 

Willemstad, 7 di òktober 2019

Tópiko:  Papia kla ku e pueblo di Kòrsou i empleadonan di refineria Isla riba 

    e tema di futuro di nos Refineria.

 

Honorabel Minister Rhuggenaath,                                                                                                                 

 

Frakshon di Movementu Futuro Kòrsou (MFK) a tuma nota den medionan di komunikashon ku gobiernu atraves di RDK i PMO a skohe pa sigui negoshá ku grupo KLESH.

 

Lokual ku e pueblo i tambe nos di Parlamento kier sa ta, kua ta e kondishonnan mínimo ku ta aseptabel den e negosiashonnan aki. Pues kiko ta e puntonan di kiebro (Breekpunten) den e negoshashonnan.

 

Nos di MFK a bin ta tuma nota tambe ku poko poko per sigur via kanalnan ofisial ta laga ventilá ku benta di Refineria huntu ku C.O.T. tambe ta un opshon. Na promé lugar nos di MFK lo rechasá tur intento pa bende nos patrimonionan, kual ta Refineria i C.O.T. (Bullenbaai Terminal). Awor ku Refineria nan den nos hemisferio a sera, manera St. Croix i Aruba, nos Refineria huntu ku C.O.T. tin un balor stratégiko inmenso.

 

Hasiendo uso di artíkulo 96 di Reglamentu di Orden di Parlamento, suskrito na nòmber di frakshon di MFK ta hasi e siguiente preguntanan na promé Minister Rhuggenaath;

 

  1. Minister Rhuggenaath ta konsiente di e balor inmenso stratégiko ku nos Refineria huntu ku C.O.T. tin, awor ku Refineria nan den nos hemisferio a sera?

 

  1. Ta bèrdat ku Gabinete Rhuggenaath kier bende e dos propiedatnan di pueblo aki (Refineria i C.O.T.), parsial of kompleto ? Nos kier sá ku ta SI òf ku ta NÒ.

 

  1. Ta bèrdat ku Grupo Klesh ta un kompania ku ta kana kumpra kosnan barata i despues kier saka probecho di esakinan, bendiendonan door i hasi ganashi astromiko ? Sin tene kuenta ku trahadornan. Gobièrnu a laga hasi un background check riba e kompania aki ?

 

  1. Minister ta na altura di kiko a pasa ku e Grupo Klesh aki den nan intento resien den Caribe pa atkerí kontròl riba un Refineria ? Por kompartí e informashon aki ku Parlamento ?

 

  1. Minister Rhuggenaath por indiká na Parlamento kua ta e posibel puntonan di kiebro (Breekpunten) den negoshashon ku grupo klesh pa loke ta trata kuponan di trabou (Pues kuantu ta e mínimo kantidat di empleado pa gobièrnu ku grupo Klesh mester tuma den servisio mesora) ?

 

  1. Promé Minister por informá Parlamento kuantu ta e mínimo na ku lo kier risibí na hur, ku ta akseptabel den e negoshashonan ku grupo Klesh pa loke ta trata e sèn di hür pa aña (PDVSA ta pagando 20 mion dòler pa aña aktualmente)?

 

  1. Promé minister por informá Parlamento si ta bende kier bende Refineria i Bullenbaai òf ta hür kier hür esakinan ku Grupo Klesh?

 

  1. Promé Minister por informá Parlamento kuantu sèn grupo Klesh ta dispuesto pa bai invertí den Refineria, pa esaki por kumpli ku normanan di medio ambiente?

 

  1. Promé minister ta dispuesto pa garantisá pueblo di Kòrsou ku den kualkier kontrato ku kualkier invershonista ku lo no los Refineria for di C.O.T. i si durante di e periodo di e kontrato e invershonista disidí di stòp operashonnan di Refineria, imediatamente e kontrato ta terminá, “van Rechtswege”?

 

Nos di MFK ta bolbe reitirá nos posishon. Nos ta kere ku nos tin sufisiente eksperiensia pa nos mes operá nos Refineria. I nos por hasi esaki komo un Service Center. Kaminda interesadonan riba un kontrato término medio i/o largu ta trese nan Crudo riba nan propio kosto. Nos ta prosesá e Crudo aki i produsí e diferente produktonan pa e kliente. Pa e transformashon aki, e kliente ta paga un “FEE” na nos. Si kier mas detaye di esaki por aserká nos di MFK libremente.

 

Frakshon di MFK ta spera ku Minister Rhuggenaath lo tuma bon nota di e preguntanan aki i ku Minister lo kontestá e preguntanan den e tempu stipulá den e protokòl entre gobièrnu i Parlamento di Kòrsou. Mirando ku e situashon ta unu hopi serio, di preokupashon i urgente pa representantenan di pueblo por sá.

 

Atentamente,

 

___________________

Charles Cooper

Miembro di Parlamento

 

  1. Gobernador di Pais Kòrsou.

 

Na: Presidente di Parlamento di Kòrsou

Señor W. Millerson

Wilhelminaplein # 4

PRESENTE

 

Kòrsou, 7 di òktober 2019

 

Apresiabel señor Millerson, 

 

Pa medio di e karta aki, hasiendo uso di artíkulo 96 di reglamentu di órden 

di Parlamento, mi ke pidi bo persona pa dirigí e karta athunto na promé Minister Eugene Rhuggenaath ku preguntanan ku frakshon di MFK ta hasi na e minister konserní.

 

Danki pa e koperashon.

 

Atentamente,

 

___________________

Charles Cooper

Miembro di Parlamento

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: